सुनको मूल्यले फेरि बनायो नयाँ रेकर्ड

काठमाडौं । पछिल्ला दिनमा सुनको मूल्य निरन्तर बढ्दै गएको छ । मंगलबार प्रतितोला २ लाख २१ हजार रुपैयाँ नाघ्दै हालसम्मकै उच्च दर कायम भएको छ ।

नेपाल सुनचाँदी व्यवसायी महासंघका अनुसार सोमबारको तुलनामा मंगलबार मात्र ३ हजार ९०० रुपैयाँले वृद्धि भएको हो । सोमबार प्रतितोला २ लाख १७ हजार ८०० रुपैयाँमा कारोबार भएको सुन मंगलबार २ लाख २१ हजार ७०० रुपैयाँमा पुगेको छ ।

यसअघि सोमबार कायम भएको दरलाई समेत रेकर्ड मानिएको थियो, तर मंगलबार पुनः नयाँ उच्च दर कायम भएको महासंघले जनाएको छ ।

त्यस्तै सुनसँगै चाँदीको मूल्यमा पनि वृद्धि भएको छ । सोमबार तोलामा २ हजार ६६० रुपैयाँमा रहेको चाँदी मंगलबार बढेर २ हजार ६८० रुपैयाँमा पुगेको छ ।