चुनावी प्रचारप्रसारमा अवरोध गरे दुई लाख जरिवाना वा तीन वर्षसम्म कैद

काठमाडौं । निर्वाचन प्रचारप्रसारमा अवरोध सिर्जना गर्ने कार्यमा संलग्न भए कडा सजाय हुने कानुनी व्यवस्था रहेको छ । निर्वाचन आयोगले फरक राजनीतिक दल वा उम्मेदवारको प्रचारमा बाधा पुर्‍याएको पाइए अधिकतम दुई लाख रुपैयाँ जरिवाना, तीन वर्षसम्म कैद वा दुवै सजाय हुन सक्ने स्पष्ट पारेको छ ।

आयोगका अनुसार सङ्घीय कानुनले निर्वाचनमा उम्मेदवारी दिन, प्रचारप्रसार गर्न वा मतदान गर्नबाट कसैलाई बञ्चित गराउने उद्देश्यले अवरोध, थुनछेक वा दबाब दिनेलाई दण्डनीय ठहर गरेको छ । प्रतिनिधिसभा सदस्य निर्वाचनका क्रममा राजनीतिक दल तथा उम्मेदवारको गतिविधि विभिन्न माध्यमबाट अनुगमन भइरहेको आयोगले जनाएको छ ।

हालै केही दल वा उम्मेदवारको चुनावी कार्यक्रम बिथोलिएको, अवरोध गरिएको वा असहज बनाइएको भन्ने गुनासो तथा उजुरीहरू आयोगमा प्राप्त भएका छन् । यस्ता विषयमा सञ्चारमाध्यममा पनि समाचार सार्वजनिक भएपछि आयोगले गम्भीर ध्यानाकर्षण भएको जनाएको छ ।

राजनीतिक दल, उम्मेदवार र तिनका भातृ संगठनले पालना गर्नुपर्ने आचारसंहिता जारी भइसकेको उल्लेख गर्दै आयोगले जुलुस, आमसभा, कोणसभा, बैठक वा अन्य कार्यक्रम बिथोल्न नहुने स्पष्ट व्यवस्था रहेको स्मरण गराएको छ ।

निर्वाचन (कसुर तथा सजाय) ऐनअनुसार निर्वाचन प्रक्रियामा कसैलाई उम्मेदवारी दिन, प्रचारप्रसार गर्न वा मतदान गर्नबाट रोक्न खोज्नु कानुनविपरीत हो । यस्तो कार्यमा संलग्न जो–कोहीलाई कानुनी दायरामा ल्याइने आयोगको चेतावनी छ ।

आसन्न निर्वाचनलाई स्वतन्त्र, स्वच्छ, निष्पक्ष र भयमुक्त वातावरणमा सम्पन्न गराउनु सबै सरोकारवालाको साझा दायित्व भएको आयोगले दोहोर्‍याएको छ । साथै, कानुनविपरीत गतिविधि नगर्न र शान्तिपूर्ण वातावरण कायम राख्न सबै राजनीतिक दल, उम्मेदवार तथा नागरिकलाई आयोगले आग्रह गरेको छ ।