बाढी प्रभावित क्षेत्रमा हैजा रोकथामका लागि खोप अभियान तीव्र

काठमाडौं । बाढीपछि खानेपानी र सरसफाइको अवस्था प्रभावित हुँदा हैजा फैलिने जोखिम बढेपछि स्वास्थ्य तथा खाद्य स्वच्छता मन्त्रालयले प्रभावित जिल्लामा खोप तथा स्वास्थ्य सामग्रीको व्यवस्थापन तीव्र पारेको छ ।

मन्त्रालयले मंगलबार नुवाकोटका लागि हैजाविरुद्धको ८० हजार ५ सय २३ डोज खोप पठाएको छ । खोपसँगै २३ बक्स, १० थान फ्रिज–फ्री भ्याक्सिन क्यारियर, ०।६ लिटर क्षमताका २२० थान आइस प्याक र ८ थान फ्रिज ट्यागसमेत पठाइएको मन्त्रालयले जनाएको छ ।

रसुवामा भने आवश्यक खोप यसअघि नै हेलिकप्टरमार्फत पठाइसकिएको छ । त्यहाँ बिहीबारदेखि हैजाविरुद्धको खोप अभियान सञ्चालन गर्ने तयारी गरिएको छ ।

बाढीका कारण खानेपानी तथा सरसफाइ प्रणालीमा क्षति पुगेकाले हैजासहित विभिन्न पानीजन्य रोगको संक्रमण फैलिन सक्ने जोखिम रहेको मन्त्रालयको भनाइ छ । यही जोखिमलाई मध्यनजर गर्दै प्रभावित क्षेत्रमा संक्रमण नियन्त्रण र रोकथामलाई प्राथमिकता दिई खोप अभियान अघि बढाउन लागिएको हो ।