प्रतिनिधिसभा निर्वाचनः आज उम्मेदवारको प्रारम्भिक नामावली सार्वजनिक हुने

काठमाडौं । आगामी फागुन २१ गते हुने प्रतिनिधिसभा सदस्य निर्वाचनका लागि उम्मेदवारी दिएका व्यक्तिहरूको नामावली आज सार्वजनिक गरिने भएको छ । निर्वाचन आयोगका अनुसार दर्ता भएका उम्मेदवारी पत्र तथा तीमाथि परेका उजुरीहरूको जाँचबुझ गरी आवश्यक निर्णयसहित आज साँझ ५ बजेसम्म उम्मेदवारको नामावली प्रकाशन गरिनेछ ।

यसअघि माघ ७ गते बुधबार उम्मेदवारको विरोधमा उजुरी दर्ता गर्ने समय तोकिएको थियो । आयोगले सो उजुरीमाथि छानबिन गरेर आज नामावली सार्वजनिक गर्न लागेको हो ।

निर्वाचन तालिकाअनुसार माघ ९ गते बिहान १० बजेदेखि दिउँसो १ बजेसम्म उम्मेदवारी फिर्ता लिन सकिने व्यवस्था गरिएको छ । त्यसपछि सोही दिन दिउँसो १ बजेदेखि ३ बजेसम्म उम्मेदवारको अन्तिम नामावली प्रकाशित गरिनेछ ।

अन्तिम नामावली सार्वजनिक भएपछि अपराह्न ४ बजेदेखि साँझ ७ बजेसम्म उम्मेदवारलाई निर्वाचन चिह्न प्रदान गरिने निर्वाचन आयोगले जनाएको छ ।