नेपाली बजारमा सुन–चाँदी दुवैको मूल्य नयाँ उच्चतम बिन्दुमा

काठमाडौं । नेपाली बजारमा सुनको मूल्यले नयाँ रेकर्ड कायम गरेको छ । मंगलबार प्रतितोला सुनको मूल्य २ लाख १७ हजार १०० रुपैयाँ पुग्दै हालसम्मकै उच्चतम स्तरमा पुगेको नेपाल सुनचाँदी व्यवसायी महासंघले जनाएको छ ।

अघिल्लो दिन अर्थात् सोमबार तोलामा २ लाख १५ हजार २०० रुपैयाँमा कारोबार भएको सुन मंगलबार १ हजार ९०० रुपैयाँले बढेको हो ।

सुनसँगै चाँदीको मूल्यमा पनि उल्लेख्य वृद्धि भएको छ । सोमबार तोलामा २ हजार २७५ रुपैयाँमा रहेको चाँदी मंगलबार बढेर २ हजार ५९५ रुपैयाँ पुगेको छ । महासंघका अनुसार चाँदीको यो मूल्य पनि हालसम्मकै उच्च हो ।