चन्द्रपुर उद्योग वाणिज्य संघको अध्यक्षताका लागि सापकोटा पक्षमा समर्थन बढ्दो, अधिवेशनमा प्रतिस्पर्धा हुने संकेत

रौतहट । चन्द्रपुर नगर उद्योग वाणिज्य संघको २८औँ वार्षिक साधारण सभा तथा ८औँ अधिवेशनको पूर्वसन्ध्यामा वर्तमान अध्यक्ष उदय नारायण सापकोटा पुनः नेतृत्वमा फर्कन सक्ने सम्भावना बलियो देखिएको छ । शनिबार संघको नव निर्मित भवनमा हुन लागेको अधिवेशनमा सापकोटाको पुनः उम्मेदवारीलाई व्यवसायी समुदायले सकारात्मक रूपमा ग्रहण गरिरहेको छ ।

सापकोटाको नेतृत्वमा संघले संरचनागत रूपमा सशक्त रूप लिएको, सदस्य व्यापारीका समस्यामा सक्रियता देखाएको तथा नीति सुधारमा समेत अग्रसरता देखाएको व्यापारीहरू बताउँछन् । संघको आफ्नै भवन निर्माण, व्यवसायी हितको पैरवी र प्रशासनसँगको समन्वयमा उनले खेलेको भूमिकाले उनीप्रति भरोसा बढाएको छ ।

“सापकोटाज्यूले संघलाई व्यवस्थित संस्थाका रूपमा उभ्याउनु भयो,” व्यापारी शिवराम राउत भन्छन्, “अझ बाँकी रहेका कामहरू पुरा गर्न उहाँकै निरन्तरता आवश्यक छ । त्यसैले हामी उहाँकै नेतृत्व चाहन्छौं ।”

सापकोटाको स्पष्ट अभिव्यक्ति, दीर्घदृष्टि, र राजनीतिक तथा प्रशासनिक वृत्तसँगको सहकार्यले उनलाई ‘भिजनरी लिडर’का रूपमा व्यवसायी समुदायमा चिनिएको छ ।

तर अध्यक्ष पदमा उनको चुनौती पनि छ । संघका पूर्व महासचिव सुनिल कुमार साहले पनि उम्मेदवारी घोषणा गरेका छन् । कांग्रेस र एमालेनिकट व्यवसायीहरूको समर्थन रहेको भनिएका साह संघमा परिवर्तन आवश्यक भएको बताउँदै मैदानमा उत्रिएका हुन् । तर महासचिव कार्यकालमा खास उपलब्धि नभएको भन्दै उनी आलोचित छन् ।

“महासचिव हुँदा उहाँबाट उल्लेखनीय योगदान देखिएन,” चन्द्रनिगाहपुरका व्यवसायी दीपक न्यौपाने भन्छन्, “यसपटक निरन्तरतालाई नै प्राथमिकता दिनु उपयुक्त हुन्छ ।”

व्यवसायमैत्री नीति निर्माण, संघ–सरकार समन्वय र युवा उद्यमशीलता प्रवर्द्धनजस्ता विषयमा सशक्त रणनीति तय गर्ने तयारी संघले गरिरहेको छ । त्यसैले यो अधिवेशन संघको भविष्यको दिशानिर्धारणका हिसाबले अत्यन्त महत्वपूर्ण मानिएको छ ।

व्यवसायीहरूको बहुसंख्यक समर्थन सापकोटा नेतृत्वको पक्षमा देखिए पनि अन्तिम घडीमा सहमति नजुटे प्रतिस्पर्धा अपरिहार्य हुने संकेत देखिएको छ ।