दिल्लीको रेस्टुरेन्टमा भीषण आगलागी, २१ जनाको मृत्यु

काठमाडौं । भारतको राजधानी दिल्लीस्थित मालवीय नगरमा रहेको एक होटल तथा रेस्टुरेन्टमा बुधबार बिहान भएको भीषण आगलागीमा कम्तीमा २१ जनाको ज्यान गएको छ ।

भारतीय सञ्चारमाध्यमका अनुसार लेमन ग्रिन रेस्टुरेन्टबाट सुरु भएको आगो माथिल्लो तलामा रहेको होटल फ्लोरिस स्टेमा फैलिएको थियो । बिहान करिब ८ः५० बजे आगलागी भएको जानकारी प्राप्त भएपछि दमकल टोली घटनास्थल पुगेको थियो ।

मृत्यु हुनेमध्ये मध्य एसिया र अफ्रिकी मुलुकका नागरिकसमेत रहेको बताइए पनि मृतकहरूको पहिचान प्रक्रिया अझै जारी छ ।

आगलागीका क्रममा भवनभित्र फसेका मानिसहरू ज्यान जोगाउन झ्यालबाट हाम फाल्न बाध्य भएको भिडियो सामाजिक सञ्जालमा सार्वजनिक भएको छ । स्थानीय बासिन्दाले उद्धारमा सहयोग पुर्‍याउन भवनमुनि गद्दा बिछ्याएका थिए ।

उद्धारकर्ताले हालसम्म ३७ जनालाई सुरक्षित बाहिर निकालेका छन् । उद्धार गरिएकामध्ये धेरैको अवस्था गम्भीर रहेको जनाइएको छ। केही व्यक्तिलाई भवनको बेसमेन्टबाट समेत निकालिएको थियो ।

घटनाको कारण खुल्न बाँकी रहेको छ । दिल्ली अग्नि सेवा र सम्बन्धित निकायले आगलागीबारे अनुसन्धान सुरु गरेका छन् ।