स्कटल्यान्डमाथि नेपालको शानदार जित, सन्दीपको विश्व कीर्तिमान

काठमाडौं । नेपालले स्कटल्याण्डलाई ६ विकेटले पराजित गर्दै आईसीसी विश्वकप लिग–२ त्रिकोणात्मक सिरिजमा लगातार दोस्रो जित निकालेको छ । अमेरिकासहितको शृंखलाअन्तर्गत सोमबार भएको खेलमा नेपालले स्कटल्यान्डले दिएको १९५ रनको लक्ष्य ३८.१ ओभरमा ४ विकेट गुमाएर पूरा गरेको हो ।

यो जितसँगै नेपाल २२ अंकसहित अंक तालिकाको पाँचौँ स्थानमा उक्लिएको छ । २७ खेल खेलेको नेपालले १० जित, १५ हार र दुई खेलमा अंक बाँडेको छ । शीर्ष चारमा रहन सके नेपालले विश्वकप ग्लोबल छनोट खेल्दै एकदिवसीय वरीयता जोगाउनेछ ।

नेपालको जितमा कप्तान रोहित पौडेल र युवा ब्याटर इशान पाण्डे चम्किए । तेस्रो विकेटका लागि उनीहरूले १०४ रनको साझेदारी गर्दै टोलीलाई सहज अवस्थामा पुर्‍याए । रोहित ६८ रनमा अविजित रहे भने इशानले ५५ रनको महत्वपूर्ण अर्धशतक प्रहार गरे । अमेरिकाविरुद्ध डेब्यु गरेका इशानको यो लगातार दोस्रो प्रभावशाली प्रदर्शन हो ।

ओपनर आसिफ सेख र कुशल भुर्तेलले नेपाललाई आक्रामक सुरुवात दिलाएका थिए । पहिलो विकेटका लागि दुवैले ६.४ ओभरमा ५८ रन जोडे । आशिफले २९ तथा कुशलले २८ रन बनाए ।

यसअघि कीर्तिपुरस्थित त्रिभुवन युनिभर्सिटि अन्तर्राष्ट्रिय क्रिकेट मैदानमा टस जितेर ब्याटिङ गरेको स्कटल्यान्ड ३९।१ ओभरमा १९४ रनमा अलआउट भएको थियो । स्कटल्यान्डका लागि ब्रान्डोन म्याकमुलेनले ७३ रनको आक्रामक इनिङ खेले पनि टोलीलाई ठूलो स्कोरतर्फ लैजान सकेनन् ।

नेपालका स्पिनर सन्दीप लामिछाने उत्कृष्ट बलिङ गर्दै ४ विकेट लिए । पछिल्ला केही खेलमा अपेक्षाअनुसार प्रदर्शन गर्न नसकेका ललितले ७ ओभरमा २५ रन खर्चेर स्कटल्यान्डको मध्यक्रम ध्वस्त पारे ।

यस्तै, लामिछानेले ३ विकेट लिँदै ऐतिहासिक उपलब्धि हात पारे । उनले ओडीआई क्रिकेटमा सबैभन्दा छिटो १५० विकेट पूरा गर्ने विश्व कीर्तिमान बनाएका हुन् । सन्दीपले ब्रान्डोन म्याकमुलेनलाई आउट गर्दै अस्ट्रेलियाका मिचेल स्टार्कको कीर्तिमान तोडे ।

नेपालले यसअघि अमेरिकालाई ८ विकेटले हराएको थियो भने पहिलो खेलमा स्कटल्यान्डसँग डीएलएस विधिमा २ रनले पराजित भएको थियो । सोमबारको जितसँगै नेपालले त्यस हारको बदला पनि लिएको छ ।

लिग–२ अन्तर्गत घरेलु मैदानमा अन्तिम शृंखला खेलिरहेको नेपालले अब शुक्रबार अमेरिकासँग प्रतिस्पर्धा गर्नेछ । अंक तालिकामा स्कटल्यान्ड ३८ अंकसहित शीर्ष स्थानमा छ भने अमेरिका ३६ अंकसहित दोस्रो स्थानमा रहेको छ ।