रुबी साह हत्या प्रकरणः मुख्य आरोपी पासवान शरीर जलेको अवस्थामा भेटिए

रौतहट । रुबी साह हत्या प्रकरणमा संलग्न भनिएका मुख्य आरोपी लक्ष्मण पासवानलाई रौतहट प्रहरीले जलेको अवस्थामा फेला पारेको छ ।

जिल्ला प्रहरी कार्यालय रौतहटका प्रवक्ता डिएसपी राजु कार्कीका अनुसार पासवानले आफैं डिजेल खन्याएर शरीरमा आगो लगाएको अवस्थामा प्रहरीले फेला पारेको हो । माधवनारायण नगरपालिका–६, माधोपुर पछाडिको आँपको बगैँचा हुँदै बिसुनपुरवा–मानपुरतर्फ जाने बाटोमा स्थानीयले देखेपछि प्रहरीलाई खबर गरेका थिए ।

प्रहरी चौकी माधोपुर र जिल्ला प्रहरी कार्यालयको टोलीले उनलाई तत्काल उद्धार गरी प्रादेशिक अस्पताल गौरमा भर्ना गरेको छ । उनको टाउकोसहित शरीरको अधिकांश भाग जलेको र बोल्नसमेत कठिन भएको प्रहरी स्रोतले जनाएको छ । हाल उनको अवस्था गम्भीर रहेको बताइएको छ ।

गत शनिबार राति गौर–सिर्सिया सडकखण्ड अन्तर्गत मुडवलवा रोड नजिक सुटकेसभित्र २६ वर्षीया रुबी देवी साहको शव फेला परेको थियो ।

प्रारम्भिक अनुसन्धान अनुसार पासवानले गौरस्थित भाडाको घरमा रुबीको हत्या गरी शव सुटकेसमा हालेर इ–रिक्सामा लैजाने प्रयास गरेका थिए । तर, रिक्सामा समस्या आएपछि सुटकेस त्यही छाडेर भागेका थिए । प्रहरीले ५०० रुपैयाँमा भाडामा लगिएको रिक्साका चालकलाई नियन्त्रणमा लिएर सोधपुछ गर्दा पासवानसम्म पुग्न सफल भएको हो ।

मृतक रुबी साह हाल गौर–२, महादेवपाट्टीमा डेरा गरी बस्दै आएकी थिइन् । उनी माधवनारायण–६, मधोपुरकी सुनिच्छा देवीकी छोरी हुन् । रुबीको विवाह भारत, बिहार, मुजफ्फरपुर निवासी शिवकुमार साहसँग भएको थियो । उनका ४ वर्षका एक छोरा रहेका छन् ।