अमेरिकाविरुद्ध नेपालको चुनौती, पहिलो जितको खोजीमा घरेलु टोली

काठमाडौं । आईसीसी क्रिकेट विश्वकप लिग–२ अन्तर्गत जारी त्रिकोणात्मक सिरिजमा नेपाली राष्ट्रिय क्रिकेट टोलीले आज (शनिबार) अमेरिकासँग प्रतिस्पर्धा गर्दैछ । कीर्तिपुरस्थित त्रिवि क्रिकेट मैदानमा हुने खेल बिहान ९ः३० बजे सुरु हुनेछ ।

सिरिजमा दुबै टोली पहिलो जित निकाल्ने लक्ष्यसहित मैदान उत्रिन लागेका हुन् । नेपालले आफ्नो पहिलो खेलमा स्कटल्यान्डसँग डीएलएस मेथडमा २ रनको झिनो हार बेहोरेको थियो । उता अमेरिकाले पनि स्कटल्यान्डसँग समान अन्तरले पराजय भोगेको थियो । त्यसैले शनिबारको खेल दुवै टोलीका लागि पुनरागमनको अवसरका रूपमा हेरिएको छ ।

घरेलु मैदानमा अन्तिम लिग–२ सिरिज खेलिरहेको नेपालका लागि यो प्रतियोगिता निकै महत्त्वपूर्ण मानिएको छ । एकदिवसीय अन्तर्राष्ट्रिय वरीयता जोगाइराख्न नेपाललाई शीर्ष ६ भित्र रहनैपर्ने दबाब छ । शीर्ष ४ टोलीले सिधै विश्वकप छनोट खेल्ने अवसर पाउने भएकाले नेपाल कम्तीमा छैटौँ स्थान सुरक्षित गर्ने लक्ष्यमा छ ।

प्लेइङ–११ मा परिवर्तनको संकेत
अमेरिकाविरुद्धको खेलमा नेपाली टोलीमा केही परिवर्तन हुन सक्ने सम्भावना देखिएको छ । मुख्य प्रशिक्षक स्टुआर्ट लले विनोद भण्डारी र अर्जुन कुमाललाई विश्राम दिन सक्ने चर्चा छ । उनीहरूको स्थानमा कुशल भुर्तेल र युवा ब्याटर ईशान पाण्डे मैदानमा देखिन सक्ने अनुमान गरिएको छ ।

यदि अवसर पाए ईशान पाण्डेले नेपालका लागि आफ्नो पहिलो ओडीआई खेल खेल्नेछन् । घरेलु समर्थकमाझ डेब्यु गर्ने सम्भावनाले उनको चर्चा बढेको छ ।

बलिङ मजबुत, ब्याटिङमा सुधार आवश्यक
स्कटल्यान्डविरुद्धको खेलमा नेपालको बलिङ प्रदर्शन प्रभावशाली देखिएको थियो । करण केसी, सोमपाल कामी र सन्दीप लामिछानेले विपक्षीलाई दबाबमा राखेका थिए । तर ब्याटिङतर्फ शीर्षक्रमका खेलाडी जिम्मेवार बन्न नसक्दा नेपाल हार टार्न असफल भयो ।

विशेषगरी मध्यक्रमले लामो साझेदारी बनाउन नसक्नु टोलीको कमजोरीका रूपमा देखिएको छ । अमेरिकाविरुद्ध नेपालले सुरुआती विकेट जोगाउँदै ठूलो साझेदारी निर्माण गर्नुपर्ने दबाब हुनेछ ।

अमेरिका पछिल्ला भेटमा हावी
नेपाल र अमेरिकाबीच पछिल्ला केही भेटमा अमेरिका बलियो देखिएको छ । दुई टोलीबीच सन् २०२५ नोभेम्बरमा यूएईमा भएको लिग–२ खेलमा नेपाल ४ विकेटले पराजित भएको थियो ।

नेपालले अमेरिकामाथि अन्तिम जित सन् २०२३ मा दर्ता गरेको थियो । त्यसपछि भएका चार भेटमा भने अमेरिका विजयी बनेको छ । यही कारण आजको खेल नेपालका लागि बदला लिने अवसरसमेत बन्न सक्छ ।

अंक तालिकामा नेपालको अवस्था कमजोर
हाल लिग–२ को अंक तालिकामा नेपाल सातौँ स्थानमा रहेको छ । नेपालले २५ खेलबाट ८ जित, १५ हार र २ खेलमा अंक बाँड्दै १८ अंक जोडेको छ ।

स्कटल्यान्ड ३८ अंकसहित शीर्ष स्थानमा छ भने अमेरिका ३६ अंकसहित दोस्रो स्थानमा रहेको छ । ओमान, नेदरल्यान्ड, नामिबिया र क्यानडा क्रमशः तेस्रोदेखि छैटौँ स्थानमा छन् । यूएई भने तालिकाको पुछारमा छ ।

नेपालका लागि अबका प्रत्येक खेल ‘गर या मर’को अवस्थामा पुगेका छन् । घरेलु समर्थकको साथ र परिचित मैदानको फाइदा उठाउँदै अमेरिकाविरुद्ध जित निकाल्न सके नेपाललाई शीर्ष ६ को दौडमा ठूलो राहत मिल्नेछ ।