खाडी क्षेत्रमा बढ्दो तनावपछि सरकार सतर्क, नेपालीको सुरक्षाका लागि चार महत्वपूर्ण निर्णय

काठमाडौं । खाडी क्षेत्रमा पछिल्लो समय देखिएको सुरक्षा संवेदनशीलतालाई मध्यनजर गर्दै सरकारले नेपाली नागरिकको सुरक्षाका लागि विभिन्न तयारी सुरु गरेको छ ।

परराष्ट्र मन्त्रालयले आइतबार खाडी तथा मध्यपूर्वका देशमा रहेका नेपाली कूटनीतिक नियोगहरूलाई उच्च सतर्कता अपनाउन निर्देशन दिएको छ । त्यहाँ बसोबास गर्ने नेपाली नागरिकको अवस्था निरन्तर निगरानी गर्न दूतावासहरूलाई भनिएको मन्त्रालयले जनाएको छ ।

परिस्थिति थप जटिल बनेमा आवश्यक निर्णय तत्काल लिन सक्ने गरी विभिन्न संयन्त्रहरू पनि बनाइँदैछन् । मन्त्रालयअन्तर्गत मध्य एसिया, पश्चिम एसिया तथा अफ्रिका महाशाखाका सहसचिव रामकाजी खड्काले प्रभावित देशहरूमा रहेका नेपाली दूतावास तथा नियोगहरूले नागरिकका लागि सूचना र सतर्कता सन्देश जारी गरिसकेको जानकारी दिए ।

उनका अनुसार विभिन्न देशहरूले जारी गरेका आधिकारिक वक्तव्य तथा समग्र सुरक्षा अवस्थालाई मन्त्रालयले निरन्तर निगरानी गरिरहेको छ ।

सरकारले सुरु गर्‍यो चार तयारी
(१) बहु–सरोकारवाला आपतकालीन उद्धार टोलीको गठनः परराष्ट्र सचिवको संयोजकत्वमा ुमल्टि(स्टेकहोल्डर इमर्जेन्सी रेस्क्यु टिमु गठनको प्रक्रिया सुरु गरिएको छ । यस टोलीमा सम्बन्धित मन्त्रालय, सुरक्षा निकाय र अन्य सरोकारवाला संस्थाहरू रहनेछन् ।

(२) डिजिटल निगरानी र सूचना संयन्त्रको स्थापनाः संकट व्यवस्थापनका लागि खाडी क्षेत्रका देशहरूमा रहेका नेपाली राजदूत र नियोग प्रमुखहरू सम्मिलित एक ‘ह्वाट्सएप ग्रुप’ बनाइएको छ । यसले प्रत्येक देशको ताजा सुरक्षा अवस्था र नेपालीले भोगिरहेका समस्याबारे तत्काल जानकारी आदान–प्रदान गर्न सहयोग पुग्नेछ ।

(३) अनलाइन रजिस्ट्रेसन र मोबाइल एप विकासः सम्भावित उद्धारका लागि कन्सुलर सेवा विभागलाई अनलाइन रजिस्ट्रेसन प्लेटफर्म र मोबाइल एप विकास गर्न निर्देशन दिइएको छ । यसबाट नेपाली नागरिकले आफ्नो विवरण दर्ता गर्न सक्नेछन्, जसले संकटको समयमा उनीहरूको अवस्था पत्ता लगाउन सजिलो हुनेछ ।

(४) हटलाइन र ट्राभल एडभाइजरीको व्यवस्थाः प्रभावित क्षेत्रका लागि आधिकारिक ‘ट्राभल एडभाइजरी’ जारी गरिएको छ । साथै, नागरिकका समस्या सुन्न र सहायता प्रदान गर्न २४ सै घण्टा सञ्चालन हुने ुकन्सुलर रेस्पोन्स हटलाइनु को व्यवस्था गर्ने तयारी अघि बढाइएको छ ।