चाङ माओमिङ नेपाल आइपुगे, नेपाल–चीन सम्बन्ध सुदृढ बनाउने प्रतिबद्धता

काठमाडौं । नेपालका लागि नवनियुक्त चिनियाँ राजदूत चाङ माओमिङ शुक्रबार काठमाडौँ आइपुगेका छन् । एयर चाइनाको विमानमार्फत त्रिभुवन अन्तर्राष्ट्रिय विमानस्थल ओर्लिएका उनलाई चिनियाँ दूतावासका अधिकारीहरूले स्वागत गरेका थिए ।

यसअघि कार्यरत राजदूत छन सोङ आफ्नो कार्यकाल पूरा गरी स्वदेश फर्किएपछि चीनको परराष्ट्र मन्त्रालयले चाङलाई नयाँ जिम्मेवारीसहित नेपाल पठाएको हो । काठमाडौं आइपुगेलगत्तै उनले सामाजिक सञ्जाल ‘एक्स’मार्फत नेपाली जनतालाई सम्बोधन गर्दै नेपाल–चीन सम्बन्धलाई थप मजबुत बनाउने प्रतिबद्धता व्यक्त गरेका छन् ।

आफ्नो पहिलो सन्देशमा उनले जनवादी गणतन्त्र चीनको तर्फबाट नेपालका लागि २३औँ ‘असाधारण र सर्वाधिकार सम्पन्न राजदूत’का रूपमा नियुक्त हुन पाएकोमा गर्व लागेको उल्लेख गर्दै नेपाली जनताको आत्मीय स्वागतप्रति धन्यवाद दिएका छन् ।

यसअघि चाङ चीनको विदेश मन्त्रालयअन्तर्गत एसियाली मामिला विभागमा उप–महानिर्देशकका रूपमा कार्यरत थिए । नेपालसहित दक्षिण एसियाली मुलुकसँगको सम्बन्ध हेर्ने जिम्मेवारी सम्हालेका कारण उनलाई नेपाल मामिलामा अनुभवी कूटनीतिज्ञ मानिन्छ । सन् २०२१ देखि २०२३ सम्म उनी चेकोस्लाभियाका लागि कार्यवाहक राजदूतको जिम्मेवारीमा समेत रहेका थिए ।

चीन सरकारले उनलाई ‘असाधारण र सर्वाधिकार सम्पन्न राजदूत’ हैसियतमा नेपाल पठाएको हो, जसअनुसार नेपालमा रहँदा उनले चिनियाँ राष्ट्रपति सी चिनफिङको तर्फबाट पूर्ण कूटनीतिक अधिकार प्रयोग गर्न सक्नेछन् । दुई देशबीच हुने द्विपक्षीय सम्झौतामा हस्ताक्षर गर्ने अधिकारसमेत राजदूतलाई रहनेछ ।

राजदूत चाङले विकास र समृद्धिका लागि दीर्घकालीन मित्रतामा आधारित चीन–नेपाल रणनीतिक साझेदारीलाई थप प्रवर्द्धन गर्ने प्रतिबद्धता व्यक्त गर्दै दुई देशबीचको मित्रता अझ सुदृढ हुने विश्वास व्यक्त गरेका छन् ।