सेना दिवसको परेडमा अमेरिकी सेनाको सहभागिताप्रति माओवादीको आपत्ति

काठमाडौं । नेपाल कम्युनिस्ट पार्टी (माओवादी) ले सेना दिवसको अवसरमा काठमाडौंस्थित सैनिक मञ्च टुँडिखेलमा आयोजित परेडमा अमेरिकी सेनालाई सहभागी गराइएको विषयप्रति आपत्ति जनाएको छ ।

पार्टीका महासचिव विप्लवद्वारा जारी विज्ञप्तिमा नेपाली जनता र राजनीतिक दलहरूको सहमति बिना विदेशी सेनालाई परेडमा सहभागी गराउनु राष्ट्रिय सार्वभौमिकता र स्वाधीनतामाथि गम्भीर हस्तक्षेप भएको उल्लेख गरिएको छ । विज्ञप्तिमा यस विषयमा राज्यको आधिकारिक धारणा छिट्टै सार्वजनिक गर्न माग गरिएको छ ।

माओवादीले राष्ट्रिय सार्वभौमिकता र स्वाधीनताको संरक्षण सम्पूर्ण नेपाली जनताको साझा दायित्व भएको पनि जनाएको छ ।

विवादबारे भने नेपाली सेनाले विदेशी सेनाको प्रस्तुति सैनिक कूटनीति र अन्तर्राष्ट्रिय सम्बन्ध विस्तारको परम्परागत अभ्यासअन्तर्गत भएको स्पष्टीकरण दिएको छ ।