भारतविरुद्धको टी–२० विश्वकप खेल्ने पाकिस्तानको निर्णय, बहिष्कार फिर्ता

काठमाडौं । पाकिस्तानले भारतविरुद्धको टी–२० पुरुष विश्वकप खेल बहिष्कार गर्ने आफ्नो अघिल्लो निर्णय फिर्ता लिएको छ । पाकिस्तान सरकारले सोमबार राति औपचारिक रूपमा भारतसँगको निर्धारित खेल खेल्न राष्ट्रिय टोलीलाई निर्देशन दिएको हो ।

यस निर्णयसँगै टी–२० पुरुष विश्वकपको सबैभन्दा बढी प्रतीक्षा गरिएको भारत–पाकिस्तान भिडन्त फेब्रुअरी १५ मा श्रीलंकाको कोलम्बोमा आयोजना हुने भएको छ । दुबै देशबीचको प्रतिस्पर्धालाई विश्व क्रिकेटकै सबैभन्दा चासोपूर्ण खेलका रूपमा हेरिँदै आएको छ ।

पाकिस्तान सरकारद्वारा जारी विज्ञप्तिमा अन्तर्राष्ट्रिय क्रिकेट परिषद् (आईसीसी), पाकिस्तान क्रिकेट बोर्ड (पीसीबी) र बंगलादेश क्रिकेट बोर्ड (बीसीबी) बीच भएको बहुपक्षीय छलफल सकारात्मक रहेको उल्लेख गरिएको छ । साथै श्रीलंका र संयुक्त अरब इमिरेट्स (यूएई) लगायत विभिन्न देशहरूले आर्थिक असर पर्न सक्ने कारण देखाउँदै पाकिस्तानलाई खेल बहिष्कार नगर्न आग्रह गरेको जनाइएको छ ।

यस विषयमा पाकिस्तानका प्रधानमन्त्री शेहबाज शरीफ र श्रीलंकाका राष्ट्रपति कुमारा दिसानायकेबीच पनि प्रत्यक्ष संवाद भएको बताइएको छ । उक्त संवादपछि स्थिति थप सहज बनेको सरकारको भनाइ छ ।

यसअघि पाकिस्तानले बंगलादेशलाई टी–२० विश्वकपबाट हटाइएपछि भारतविरुद्ध खेल बहिष्कार गर्ने संकेत दिएको थियो । तर आईसीसीले बंगलादेशमाथि कुनै कारबाही नगर्ने निर्णय गरेसँगै विवाद शान्त भएको हो ।

क्रिकइन्फोका अनुसार सबै सदस्य राष्ट्रहरूले प्रतियोगिताप्रति गरेको प्रतिबद्धता पालना गर्ने र टी–२० विश्वकपलाई सफल बनाउन एकताबद्ध रूपमा अघि बढ्ने सहमति जनाएका छन् ।