इङल्यान्डविरुद्ध खेल्दै नेपालले आज टी–२० विश्वकपको सुरुवात गर्दै

काठमाडौं । नेपाली राष्ट्रिय क्रिकेट टोलीले आज (आइतबार) १०औँ संस्करणको आइसीसी टी–२० पुरुष विश्वकपको आफ्नो अभियान सुरु गर्दैछ । दुई पटकको विश्वकप च्याम्पियन इङल्यान्डविरुद्ध नेपाल भारस्थित मुम्बइको वानखेडे क्रिकेट स्टेडियममा मैदान उत्रन लागेको हो । खेल दिउँसो ३ः१५ बजे सुरु हुनेछ ।

यस विश्वकपमा नेपाल समूह चरणका आफ्ना चारै खेल वानखेडे स्टेडियममै खेल्नेछ । समग्रमा नेपालले तेस्रो पटक विश्वकप खेल्न लागेको हो भने यो लगातार दोस्रो सहभागिता हो । बलिया राष्ट्रहरूसँग प्रतिस्पर्धा गर्न पाउँदा नेपाली टोली उत्साहित देखिएको छ ।

यसपटकको विश्वकपमा नेपालका लागि १० जना अघिल्लो संस्करणका खेलाडी र केही नयाँ अनुहारले प्रतिनिधित्व गर्दैछन् । आरिफ शेख, बसिर अहमद, लोकेश बम, शेर मल्ल र नन्दन यादवले विश्वकपमा डेब्यु गर्ने तयारी गरेका छन् । उनीहरूबाट टोलीले नयाँ ऊर्जा र प्रदर्शनको अपेक्षा गरेको छ ।

वरिष्ठ अलराउन्डर सोमपाल कामी भने नेपालले खेलेका तीनवटै विश्वकपमा सहभागिता जनाउने एक्ला खेलाडी बन्ने संघारमा छन् । कप्तान रोहित पौडेलसँगै कुशल भुर्तेल, आशिफ शेख, दिपेन्द्र सिंह ऐरि, गुल्सन झा, करण केसी, सन्दीप लामिछाने, ललित राजवंशी र सन्दीप जोरा लगातार दोस्रो पटक विश्वकप खेल्न लागेका हुन् ।

इङल्यान्डविरुद्धको खेलअघि नेपाली टोलीले शनिबार पूरा आराम पाएको थियो । विश्वकप तयारीका क्रममा नेपालले युएई र क्यानडासँग खेलेका दुवै आधिकारिक वार्मअप खेलमा जित हात पारेको थियो । श्रीलंका र भारतमा अभ्यास गरेको नेपाली टोली उच्च मनोबलका साथ मैदानमा उत्रिन लागेको छ ।

सन् २०१० र २०२२ मा विश्वकपको उपाधि जितेको इङल्यान्ड नेपालविरुद्ध जित निकाल्दै प्रतियोगिताको सुरुवात सुखद बनाउने लक्ष्यमा छ । इङल्यान्डले शनिबार नै नेपालविरुद्धको खेलका लागि आफ्नो प्लेइङ–११ सार्वजनिक गरिसकेको छ ।

नेपाल रहेको समूहमा इङल्यान्डसँगै वेष्ट इण्डिज, स्कटल्यान्ड र इटाली छन् । इङल्यान्ड र वेष्ट इण्डिज दुवैले दुई–दुई पटक विश्वकपको ट्रफी उचालेका छन् भने इटालीले यस संस्करणबाट विश्वकपमा डेब्यु गर्दैछ ।

स्कटल्यान्ड भने सन् २०१६ यता लगातार विश्वकप खेल्दै आएको टोली हो । बंगलादेशले सुरक्षाको कारण देखाउँदै भारतमा आएर खेल्न अस्वीकार गरेपछि आइसीसीले वरियताका आधारमा स्कटल्यान्डलाई विश्वकपमा सहभागी गराएको हो ।

विश्वकपमा आज (आइतबार) तीन खेल हुनेछन् । दिनको पहिलो खेलमा चेन्नइमा समूह ‘डी’ का अफगानिस्तान र न्युजिल्यान्ड भिड्नेछन् भने कोलोम्बोमा घरेलु टोली श्रीलंका र आयरल्यान्ड आमनेसामने हुने तालिका छ ।

विश्वकपको पहिलो दिन हिजो (शनिबार) तीन खेल सम्पन्न भएका छन् । कोलोम्बोमा भएको उद्घाटन खेलमा पाकिस्तानले नेदरल्यान्ड्सलाई ३ विकेटले हरायो । इडेन गार्डेनमा वेष्ट इण्डिजले स्कटल्यान्डलाई ३५ रनले पराजित गर्दा वानखेडेमा साविक विजेता भारतले अमेरिकामाथि २९ रनको जित निकाल्यो ।