समानुपातिक सूचीमा त्रुटि भेटिएपछि आयोगले दियो दलहरूलाई सच्याउन निर्देशन

काठमाडौं । निर्वाचन आयोगले राजनीतिक दलहरूले बुझाएको समानुपातिक तर्फको बन्दसूचीमा विभिन्न त्रुटि देखिएपछि त्यसलाई सच्याउन दलहरूलाई औपचारिक रूपमा पत्राचार गरेको छ । आयोगका सूचना अधिकारी सुमन घिमिरेका अनुसार इमेलमार्फत सम्बन्धित दलहरूलाई देखिएका कमजोरीहरू मिलाउन निर्देशन दिइएको हो ।

आयोगले दलहरूले पेस गरेको बन्दसूचीमा नामहरूको क्लस्टर प्रतिशत परीक्षण गर्दा एउटै व्यक्तिको नाम दुई स्थानमा समावेश भएको, एक क्लस्टरमा हुनुपर्ने नाम अर्को क्लस्टरमा राखिएको जस्ता त्रुटि फेला पारेको जनाएको छ । यस्ता समस्या नेपाली कांग्रेस र नेकपा एमालेका सूचीमा समेत देखिएको आयोगको भनाइ छ ।

केही दलले बुझाएको सूचीमा उम्मेदवारको हस्ताक्षर नै नदेखिएको, साथै ‘पिछडिएको क्षेत्र’ समूहमा राखिएका व्यक्तिको नागरिकता विवरण पुनः जाँच गर्नुपर्ने अवस्था आएको आयोगले जनाएको छ । यी लगायतका अस्पष्ट र नमिलेका विषय प्रस्ट पार्न आयोगले दलहरूलाई सच्याउन आग्रह गरेको हो ।

पुस १३ र १४ गते दलहरूले निर्वाचन आयोगमा समानुपातिक तर्फका उम्मेदवारको बन्दसूची बुझाएका थिए । त्यसको अध्ययनपछि आइतबार आयोगले त्रुटि सच्याउन दलहरूलाई जानकारी गराएको हो ।

आयोगका अनुसार आजदेखि पुस २७ गतेसम्म दलहरूले औंल्याइएका त्रुटि सच्याउने समय पाउनेछन् । उम्मेदवारको बन्दसूचीबाट नाम फिर्ता लिन चाहने उम्मेदवारलाई पुस २८ गतेको समय तोकिएको छ ।

यदि कुनै उम्मेदवारले नाम फिर्ता लिएमा त्यसको जानकारी निर्वाचन आयोगले सम्बन्धित राजनीतिक दललाई पुस २९ गते दिनेछ । सो कारण रिक्त भएको स्थानमा सोही समूहको अर्को उम्मेदवार मनोनयन गरी दलले आयोगमा बुझाउने मिति पुस ३० गते तोकिएको छ ।

आयोगको कार्यतालिका अनुसार त्यसपछि प्राप्त बन्दसूचीको नामावली सार्वजनिक गरिनेछ । माघ ४ गते उम्मेदवारको बन्दसूची प्रकाशन भएपछि समावेश उम्मेदवारको योग्यता सम्बन्धमा दाबी–विरोध दर्ता गर्न सकिनेछ, जसका लागि माघ ५ देखि १० गतेसम्मको समय निर्धारण गरिएको छ ।

माघ ११ देखि १७ गतेसम्म दाबी–विरोधमाथि जाँचबुझ गरी आयोगले निर्णय गर्नेछ । अन्ततः माघ २० गते बिहान १० बजेदेखि बेलुकी ५ बजेसम्म उम्मेदवारको बन्दसूची अन्तिम रूपमा प्रकाशन हुने आयोगको तालिका रहेको छ ।