देशभर बदलीसँगै वर्षाको सम्भावना, केही स्थानमा भारी वर्षाको चेतावनी

काठमाडौं । देशका अधिकांश भू–भागमा बिहीबार मौसम बदली रहने र विभिन्न स्थानमा वर्षा हुने सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ । महाशाखाका अनुसार कोशी, मधेश, बागमती, गण्डकी र लुम्बिनी प्रदेशमा मौसम अधिकांश बदली रहनेछ भने कर्णाली र सुदूरपश्चिममा साधारणतया बदली रहनेछ ।

दिउँसो कोशी, बागमती, गण्डकी र लुम्बिनी प्रदेशका हिमाली तथा पहाडी भू–भागका धेरै स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ । कर्णाली र सुदूरपश्चिम प्रदेशका हिमाली तथा पहाडी क्षेत्रका केही स्थानमा पनि यस्तै मौसम रहने पूर्वानुमान गरिएको छ ।

तराई क्षेत्रमा पनि वर्षाको प्रभाव रहने देखिएको छ । मधेश प्रदेशसहित कोशी, बागमती, गण्डकी र लुम्बिनीका तराई भू–भागका धेरै स्थानमा तथा सुदूरपश्चिमको तराईका केही स्थानमा मेघगर्जन र चट्याङसहित मध्यम वर्षा हुनसक्ने महाशाखाले जनाएको छ ।

दिउँसो कोशी, बागमती र गण्डकी प्रदेशका केही स्थान तथा मधेश र लुम्बिनी प्रदेशका एक–दुई स्थानमा भारी वर्षाको सम्भावना रहेको छ । विशेषगरी कोशी र बागमती प्रदेशका पहाडी भू–भागका एक–दुई स्थानमा धेरै भारी वर्षा हुनसक्ने भएकाले आवश्यक सतर्कता अपनाउन महाशाखाले आग्रह गरेको छ ।

वर्षासँगै कोशी र मधेश प्रदेशका तराई क्षेत्रमा हावाहुरीको समेत सम्भावना रहेको छ । मेघगर्जन, चट्याङ र हावाहुरीको समयमा खुला स्थानमा नबस्न तथा आवश्यक सावधानी अपनाउन मौसमविद्ले सुझाव दिएका छन् ।

राति पनि वर्षा र हिमपातको सम्भावना
रातिको समयमा पनि देशको मौसममा उल्लेख्य सुधार नआउने पूर्वानुमान छ । कोशी, मधेश, बागमती, गण्डकी र लुम्बिनी प्रदेशमा अधिकांश बदली तथा कर्णाली र सुदूरपश्चिममा साधारणतया बदली रहनेछ ।

राति कोशी, बागमती, गण्डकी र लुम्बिनी प्रदेशका हिमाली तथा पहाडी भू–भागका धेरै स्थानमा मेघगर्जन र चट्याङसहित मध्यम वर्षा तथा हिमपात हुनसक्नेछ । कर्णाली र सुदूरपश्चिमका हिमाली तथा पहाडी भू–भागका थोरै स्थानमा पनि वर्षा र हिमपातको सम्भावना रहेको छ ।

त्यसैगरी, मधेशसहित कोशी, बागमती, गण्डकी र लुम्बिनी प्रदेशका तराई भू–भागका धेरै स्थान तथा सुदूरपश्चिमको तराईका केही स्थानमा राति पनि मेघगर्जन र चट्याङसहित मध्यम वर्षा हुनसक्ने महाशाखाले जनाएको छ ।

राति कोशी, बागमती, गण्डकी र लुम्बिनी प्रदेशका थोरै स्थान तथा मधेश प्रदेशका एक–दुई स्थानमा भारी वर्षाको सम्भावना छ । कोशी र लुम्बिनी प्रदेशका पहाडी तथा तराई भू–भागका एक–दुई स्थानमा भने धेरै भारी वर्षा हुनसक्ने भएकाले ती क्षेत्रका बासिन्दालाई थप सतर्क रहन महाशाखाले आग्रह गरेको छ ।

लगातार वर्षा हुने सम्भावना रहेकाले पहाडी क्षेत्रमा पहिरो तथा नदी–खोलामा पानीको बहाव बढ्नसक्ने जोखिमप्रति पनि सचेत रहन आवश्यक देखिएको छ ।