निर्वाचनको तयारीमा सरकार, शीर्ष नेतासँग सघन संवाद

काठमान्डु । प्रतिनिधिसभा निर्वाचनको अनुकूल वातावरण बनाउन वर्तमान सरकारले राजनीतिक संवादलाई तीव्र बनाएको छ । आगामी फागुन २१ गते तय भएको निर्वाचनलाई लक्षित गर्दै सरकारले प्रमुख तीन दलका शीर्ष नेतासँग निरन्तर छलफल सुरु गरेको हो ।

यसैक्रममा आज सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलले नेपाली कांग्रेसका सभापति शेरबहादुर देउवासँग महाराजगञ्जस्थित निवासमा भेटवार्ता गरिरहेका छन् ।

मन्त्री खरेलको सचिवालयका अनुसार आजै उनले नेपाल कम्युनिष्ट पार्टी (एमाले) का अध्यक्ष केपी शर्मा ओली र नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’सँग पनि छुट्टाछुट्टै छलफल गर्ने कार्यक्रम तय भएको छ ।

सरकारले निर्वाचनलाई समयमै, स्वतन्त्र र विश्वसनीय रूपमा सम्पन्न गर्ने उद्देश्यले राजनीतिक सहमति र समन्वयलाई प्राथमिकता दिएको बताइएको छ ।