१०० दिनमा १०१ कार्य सम्पन्न गरेको मन्त्री कुलमान घिसिङको दाबी

काठमान्डु । ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकास मन्त्रालयको जिम्मेवारी सम्हालेका मन्त्री कुलमान घिसिङले पदभार ग्रहण गरेको १०० दिनभित्र आफूले गरेका काम सार्वजनिक गरेका छन् । उनले यस अवधिमा तीनवटै मन्त्रालय अन्तर्गत १०१ वटा महत्वपूर्ण कार्य सम्पन्न गरेको दाबी गरेका छन् ।

मन्त्री घिसिङका अनुसार उनले अधिकांश समय फिल्डमै खटिएर काम गरेका छन् । विपद् व्यवस्थापनलाई प्रभावकारी बनाउने, फोहोर व्यवस्थापनमा सुधार ल्याउने, लामो समयदेखि अल्झिएका तथा कार्य प्रगति नदेखिएका ठेक्काहरू तोड्ने जस्ता निर्णयहरू यस अवधिका प्रमुख उपलब्धि भएको उनले बताए ।

ऊर्जा क्षेत्रतर्फ विशेष ध्यान दिँदै उनले नेपाल विद्युत प्राधिकरणसँग सम्बन्धित केही विगतका गलत अभ्यासहरू अन्त्य गरिएको उल्लेख गरे । आम नागरिक लोडसेडिङको समस्याबाट पीडित भइरहँदा डेडिकेटेड र ट्रंक लाइन प्रयोग गर्ने उद्योगहरूले तिर्नुपर्ने प्रिमियम महसुल राजनीतिक हस्तक्षेपका कारण उठ्न नसकेको उनको भनाइ छ ।

‘स्पष्ट निर्देशन र दृढ निर्णयका कारण अब ती उद्योगहरूले बक्यौता महसुल तिर्न सुरु गरेका छन्,’ मन्त्री घिसिङले भने । यसले ऊर्जा क्षेत्रमा अनुशासन कायम हुनुका साथै राज्यको राजस्व वृद्धि हुने विश्वास उनले व्यक्त गरे ।

मन्त्री घिसिङले आगामी दिनमा पनि परिणाममुखी कामलाई प्राथमिकता दिँदै पूर्वाधार विकास, सहरी व्यवस्थापन र ऊर्जा क्षेत्रलाई अझ प्रभावकारी बनाउने प्रतिबद्धता जनाएका छन् ।