अस्पताल भवन निर्माणमा ढिलाइप्रति मन्त्री घिसिङ असन्तुष्ट

पोखरा । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले पोखरामा निर्माणाधीन पोखरा स्वास्थ्य विज्ञान प्रतिष्ठान अस्पतालको स्थलगत निरीक्षण गरेका छन् ।

आइतबार निर्माणस्थलको अनुगमन गर्दै मन्त्री घिसिङले अस्पताल भवन निर्माणमा भइरहेको लामो ढिलाइप्रति गम्भीर चासो व्यक्त गरे । निरीक्षणका क्रममा उनले महाशाखा प्रमुख, प्रतिष्ठानका उपकुलपति तथा निर्माण व्यवसायीसँग निर्माणको प्रगति, समयतालिका र समस्याबारे छलफल गरेका थिए ।

जनताको प्रत्यक्ष स्वास्थ्य सेवासँग जोडिएको संवेदनशील संरचनाको निर्माणमा यसरी ढिलाइ हुनु अस्वीकार्य रहेको बताउँदै मन्त्री घिसिङले अब यथास्थितिमा राखेर निर्माणलाई बन्धक बनाउन नदिइने स्पष्ट पारे । उनले तत्काल काम अघि नबढे ठेक्का तोडेर निर्माण व्यवसायीमाथि कारबाही गरिने चेतावनी समेत दिए ।

मन्त्री घिसिङले एक साताभित्र निर्माणले स्पष्ट गति नलिएमा ठेक्का तोड्ने प्रक्रिया अघि बढाउन सम्बन्धित कार्यालयलाई निर्देशन दिएका छन् ।

उता, प्रतिष्ठानका उपकुलपति भरत खत्रीले भवन अभावकै कारण स्वास्थ्य सेवा प्रवाहमा समस्या भइरहेको उल्लेख गर्दै तत्काल निर्माण सम्पन्न गर्नुपर्ने आवश्यकता औँल्याए । निर्माण गर्न नसक्ने अवस्था आए ठेक्का तोडेर नयाँ प्रक्रियाबाट अघि बढ्नुपर्ने उनको भनाइ थियो ।

पोखरामा निर्माणाधीन पोखरा स्वास्थ्य विज्ञान प्रतिष्ठान अस्पतालको मेडिकल भवन पाँच वर्ष बितिसक्दा पनि पूरा हुन सकेको छैन । माघ २०७७ मा २० महिनाभित्र निर्माण सम्पन्न गर्ने गरी ठेक्का सम्झौता गरिएको भए पनि हालसम्म करिब ५१ प्रतिशत मात्र भौतिक प्रगति भएको छ । तेस्रो पटक थप गरिएको समयावधि पनि गत साउनमै सकिएको छ ।

शहरी विकास मन्त्रालयअन्तर्गत संघीय शहरी भवन कार्यालय पोखराले उक्त भवन कर बाहेक १० करोड ५५ लाख रुपैयाँ लागतमा निर्माण गरिरहेको हो ।