एनपीएलमा चितवनका रञ्जितको पाँच विकेट, विराटनगरको अपराजित यात्रा रोकियो

काठमान्डु । चितवन राइनोजका बलर रञ्जित कुमारको उत्कृष्ट प्रदर्शनका कारण विराटनगर किंग्सले नेपाल प्रिमियर लिग (एनपीएल)मा पहिलो हार बेहोर्नु परेको छ । बुधबार कीर्तिपुरस्थित त्रिवि क्रिकेट मैदानमा भएको खेलमा चितवनले विराटनगरलाई ४८ रनले पराजित गर्दै प्रतियोगितामा आफ्नो प्लेअफ सम्भावना बलियो बनाएको छ ।

चार खेलमध्ये तीनमा जित दर्ता गरेको विराटनगर यसअघि अपराजित रहँदै आएको थियो । तर चितवनसँगको प्रतिस्पर्धामा उनीहरूको ब्याटिङ लाइनअप ढलेपछि विजय श्रृङ्खला समाप्त भयो । सोसँगै विराटनगरले अब तीन जित र एक हारको नतिजासहित अंकतालिकामा आफ्नो यात्रा जारी राख्नेछ ।

चितवनले दिएको १७५ रनको लक्ष्य पछ्याउने क्रममा विराटनगर १६.५ ओभरमै १२६ रनमा समेटियो । टोलीका मार्चेन्ट डे लाङ्गेले ३९ रन बनाएर पारी सम्हाल्ने प्रयास गरे भने प्रतिश जिसी (३०) र साम हेजलेट (२२) ले योगदान दिए । तर बाँकी खेलाडीहरू दोहोरो अंकमै पुग्न नसक्दा टोली ठूलो अन्तरले पराजित हुन पुग्यो ।

चितवनका लागि रञ्जित कुमार खेलका हीरो बने । उनले दुई ओभरमा लगातार दुई(दुई विकेटसहित पाँच विकेट झारे र आफ्नो स्पेलमा जम्मा २१ रन मात्र खर्चिए । एनपीएलको यो सिजनमा एकै खेलमा पाँच विकेट लिने उनी पहिलो बलर बनेका छन् । कमलसिंह ऐरीले दुई विकेट लिए भने सोहेल तनविर र सैफ जैबले एक–एक विकेट हात पारे ।

पहिले ब्याटिङ गर्दै चितवनले पाँच विकेटको क्षतिमा १७४ रनको प्रतिस्पर्धी योगफल बनाएको थियो । टोलीका रवि बोपाराले ३८ बलमा ६५ रन प्रहार गर्दै इन्निङ्स सेट गरे । उनले लगातार तेस्रो खेलमा अर्धशतक पूरा गरेका हुन् । चार रनमा सन्दीप लामिछानेको बलमा क्याच छुटेपछि जीवनदान पाएका बोपाराले त्यसलाई राम्रोसँग प्रयोग गर्दै तीन चौका र चार छक्का हिर्काए ।

यस जितसँगै चितवन २ जित र १ हारसहित चार अंक बनाउँदै अंकतालिकाको तेस्रो स्थानमा पुगेको छ ।