रेशम चौधरीले पत्नी रञ्जिता हटाएर बुवालाई बनाए अध्यक्ष

काठमाडौं । नागरिक उन्मुक्ति पार्टी (नाउपा)का संरक्षक रेशम चौधरीले वर्तमान अध्यक्ष तथा पत्नी रञ्जिता चौधरीलाई पदमुक्त गर्दै आफ्ना बुवा लालवीर चौधरीलाई नयाँ अध्यक्ष नियुक्त गरेका छन् ।

बुधबारदेखि काठमाडौंमा सुरु भएको प्रथम राष्ट्रिय भेलाबाट चौधरीले यस्तो निर्णय गराएका हुन् । भेलाबाट रञ्जितालाई पार्टीको साधारण सदस्यबाटसमेत हटाइएको छ ।

पार्टीमा विवाद चर्किरहेका बेला गत आइतबार रञ्जिता चौधरीले आफू अस्वस्थ रहेको भन्दै वरिष्ठ उपाध्यक्ष शिव बास्तोलालाई कार्यवाहक अध्यक्ष तोकेकी थिइन् । तर त्यस निर्णयलाई नै गलत ठहर गर्दै रेशम पक्षले राष्ट्रिय भेलाबाट रञ्जितालाई अध्यक्ष पदबाट हटाउने निर्णय गरायो ।

रेशम पक्षको आरोप छ— रञ्जिताले केन्द्रीय समिति बैठकबिना आफूखुसी कार्यवाहक अध्यक्ष तोकेको हो । सोही कारण उनलाई पार्टीबाटै बाहिर गरिनुपरेको रेशमको भनाइ छ ।

रञ्जिता चौधरी र रेशम चौधरीबीच पारिवारिक दूरी पनि देखिएको छ । अर्की पत्नीको साथमा बसिरहेका रेशमले अब पार्टीबाट पनि रञ्जितासँग सम्बन्ध तोडेका छन् । सोही निर्णयसँगै उनले आफ्ना बुवा लालवीरलाई पार्टी अध्यक्षको जिम्मेवारी सुम्पिएका छन् ।

२०७९ को संघीय निर्वाचनमा चार सिट जितेर चर्चामा आएको नाउपा अहिले भित्र्याएको विवादका कारण अन्योलमा परेको छ । प्रतिनिधिसभासँगै लुम्बिनी र सुदूरपश्चिम प्रदेशसभामा समेत प्रतिनिधित्व गरिरहेको पार्टीभित्र शक्ति सन्तुलन र निर्णय प्रक्रियाबारे गम्भीर संकट देखिएको छ ।

पार्टीबाट हटाइएकी रञ्जिता चौधरीले यस घटनाबारे असन्तुष्टि जनाएकी छन् । उनले संसदीय दलका नेता गंगाराम चौधरीसँग स्पष्टीकरण मागिसकेकी छन् । रञ्जिता पक्षधरले अब छुट्टै निर्णय लिने तयारी गरिरहेको बुझिएको छ ।

राष्ट्रिय भेलामा बोल्दै रेशमले पार्टीको नेतृत्व प्रक्रियाबारे स्पष्ट प्रक्रिया अपनाइनुपर्ने बताए । उनले भने, “रञ्जिताजीले कार्यवाहक अध्यक्ष तोक्नु अराजनीतिक निर्णय थियो । केन्द्रीय बैठकबिना त्यो निर्णय स्वीकार्य छैन ।”

उनले पार्टीभित्र भइरहेका घटनालाई सामान्य राजनीतिक प्रक्रिया बताए पनि अध्यक्ष पदमा बुवालाई ल्याउनु आफ्नो व्यक्तिगत चाहना नभएको पनि प्रस्ट पारे ।

नाउपाको यो घटनाक्रमले देखाएको छ— पार्टीको नेतृत्व विवाद अब केवल राजनीतिक नभएर पारिवारिक द्वन्द्वमा समेत परिणत भएको छ । यही कार्यकालमा पहिलो चुनाव जितेको पार्टीभित्रको संकटले अब उसको अस्तित्वमै प्रश्न उठाएको छ ।