प्रधानाध्यापकलाई ‘स्वागत नगरेको’ भन्दै सांसद पोखरेलको अभिव्यक्ति विवादमा, चर्कियो आलोचना

काठमाडौं । राष्ट्रिय स्वतन्त्र पार्टी (रास्वपा) का सांसद विश्वराज पोखरेलले एक विद्यालयका प्रधानाध्यापकप्रति दिएको अभिव्यक्ति विवादमा तानिएको छ । गृह जिल्ला ओखलढुङ्गाको एक विद्यालयमा पुगेका क्रममा स्वागत गर्न नआएको भन्दै उनले प्रधानाध्यापकलाई सार्वजनिक रूपमा हप्काएको घटना बाहिरिएपछि पार्टीभित्र र बाहिर तीव्र आलोचना सुरु भएको हो ।

पूर्व एआइजीसमेत रहेका पोखरेलले आफू आउने जानकारी हुँदाहुँदै पनि स्वागत गर्न ननिस्किएको भन्दै प्रधानाध्यापकप्रति आक्रोश व्यक्त गरेका थिए । ‘म आउँदैछु भनेपछि तपाईं बाहिर निस्किनु पर्छ, तपाईं कर्मचारी हो,’ भन्दै उनले आफूलाई ‘रिटायर्ड विशिष्ट श्रेणी कर्मचारी’ र ‘माननीय’ भएको उल्लेख गर्दै असन्तुष्टि जनाएका थिए । उनले ‘जिल्लाको माननीय आउँदा हेडमास्टर भित्रै बस्ने?’ भन्दै दिएको प्रतिक्रिया सामाजिक सञ्जालमा सार्वजनिक भएपछि विवाद चुलिएको हो ।

यस घटनापछि पूर्वशिक्षामन्त्री महावीर पुनले कडा टिप्पणी गर्दै यस्तो व्यवहार अस्वीकार्य भएको बताएका छन् । उनले सांसद जनताको सेवक भएको स्मरण गराउँदै पदको दुरुपयोग गर्ने प्रवृत्तिलाई तत्काल रोकिनुपर्ने बताए । “यस्तो व्यवहार गर्ने व्यक्तिलाई पदमा राख्नु उपयुक्त हुँदैन,” भन्दै उनले या त सार्वजनिक माफी माग्न वा जनताले फिर्ता बोलाउनुपर्ने धारणा राखेका छन् ।

रास्वपाभित्रै पनि पोखरेलको अभिव्यक्तिप्रति असन्तुष्टि देखिएको छ । पार्टीका केन्द्रीय सदस्य गणेश कार्कीले सामाजिक सञ्जालमार्फत सांसदलाई विनम्र रहन आग्रह गर्दै पद क्षणिक हुने स्मरण गराएका छन् । “केही समयअघिसम्म मत माग्दै नमस्ते गर्ने अवस्था थियो, त्यसलाई बिर्सिनु हुँदैन,” भन्ने उनको सन्देश छ ।

पत्रकार तथा शिक्षक मासिकका सम्पादक राजेन्द्र दाहालले पनि घटनाप्रति आपत्ति जनाएका छन् । उनले सार्वजनिक रूपमा एक प्रधानाध्यापकको अपमान गर्ने व्यक्तिलाई ‘माननीय’ भन्ने कि निन्दा गर्ने भन्ने प्रश्न उठाएका छन् ।

त्यस्तै, पार्टीका कार्यकर्तामाझ पनि यो विषयले तरंग ल्याएको छ । सामाजिक सञ्जालमा विभिन्न प्रतिक्रियाहरू आउँदै गर्दा रास्वपाका सक्रिय कार्यकर्ता स्वस्तिका लामिछानेले नेताको व्यवहारप्रति असन्तुष्टि जनाएकी छन् । उनले जनतासँग संवाद गर्ने शैली सिक्नुपर्ने सुझाव दिँदै मतदाताको योगदानको सम्मान गर्न आग्रह गरेकी छन् । “जनताले बनाएको पद हो, त्यसैले जनतामाथि धाक देखाउने होइन,” भन्ने उनको भनाइ छ ।

यस घटनाले जनप्रतिनिधिको आचरण र सार्वजनिक व्यवहारबारे पुनः बहस सुरु गराएको छ । सार्वजनिक पदमा रहेका व्यक्तिहरूले देखाउने व्यवहारले समग्र राजनीतिक संस्कृतिमा प्रभाव पार्ने भएकाले यसलाई गम्भीर रूपमा लिनुपर्ने आवाज उठ्न थालेका छन् ।