मधेश प्रदेशका नवनियुक्त मुख्यमन्त्री यादवले सपथ लिए

जनकपुर । मधेश प्रदेशका नवीन मुख्यमन्त्री कृष्णप्रसाद यादवले आइतबार प्रदेश प्रमुख सुरेन्द्र लाभ कर्णसमक्ष पद तथा गोपनीयताको शपथ ग्रहण गरेका छन् । शपथपछि उनले मंसिर २४ गते प्रदेश सभाबाट विश्वासको मत लिने तयारी गरिरहेको बताए ।

यादव मंसिर १९ गते सात दलका ७७ प्रदेशसभा सदस्यहरूको समर्थनमा मुख्यमन्त्री नियुक्त भएका थिए । उनको नेतृत्वलाई नेपाली कांग्रेस, जसपा नेपाल, जनमत पार्टी, तत्कालीन नेकपा माओवादी केन्द्र, लोसपा र तत्कालीन एकीकृत समाजवादीका सांसदहरूले साथ दिएका छन् ।

यसअघि संविधानको धारा १६८(३) अनुसार ठूलो दलको हैसियतले नियुक्त भएका पूर्व मुख्यमन्त्री तथा एमाले संसदीय दलका नेता सरोज कुमार यादवले मंसिर १७ गते प्रदेशसभामा सम्बोधन गर्दै राजीनामा दिएका थिए । सोही राजीनामापछि गठबन्धन दलहरूले कृष्णप्रसाद यादवलाई नयाँ नेतृत्वका रूपमा अघि सारेका हुन् ।

उता, कार्तिक २३ गते राति एमालेका यादवलाई धारा १६८(३) अनुसार मुख्यमन्त्री नियुक्त गरिएको निर्णयविरुद्ध सातदलीय गठबन्धनले सर्वोच्च अदालतमा रिट दायर गरेको थियो । अदालतले २४ घण्टाभित्र विश्वासको मत लिन र मत नपाएमा धारा १६८(२) बमोजिम नयाँ सरकार गठन गर्न आदेश दिएको थियो ।

नवनियुक्त मुख्यमन्त्री कृष्णप्रसाद यादवले सपथपछि आजै सानो आकारको मन्त्रिपरिषद् बनाउने तयारीसमेत रहेका छन् ।