दीपेन्द्रको उत्कृष्ट प्रदर्शनमा कर्णालीमाथि सुदुरपश्चिमको सहज जीत

काठमान्डु । नेपाल प्रिमियर लिग (एनपीएल) को दोस्रो संस्करणमा सुदूरपश्चिम रोएल्सले उत्कृष्ट फर्मलाई जारी राख्दै कर्णाली याक्सलाई ४५ रनले पराजित गरेको छ । कप्तान दीपेन्द्र सिंह ऐरीको सानदार बलिङ प्रदर्शन नै सुदूरपश्चिमको जितको मुख्य आधार बन्यो ।

कीर्तिपुरस्थित टीयू अन्तर्राष्ट्रिय क्रिकेट मैदानमा सोमबार भएको रोमाञ्चक डे–नाइट वेस्टर्न डर्बीमा सुदूरपश्चिमले सबै विभागमा सन्तुलित खेल प्रदर्शन गर्‍यो । १४० रनको सामान्य लक्ष्य लिएर मैदानमा ओरालिएको कर्णाली टोली सुरुवातमै दबाबमा पर्‍यो र अन्ततः १९.१ ओभरमै ९४ रनमा अलआउट भयो ।

कर्णालीका लागि पवन सर्राफले २७ रन र स्कटल्याण्डका मार्क वाटले १७ रन बनाए पनि टोलीले आवश्यक गतिमा रन जोड्न सकेन । २९ रनमै ४ विकेट गुमाएपछि कर्णाली संकटमा परेको थियो । त्यसपछि कप्तान सोमपाल कामी र पवन सर्राफले ३४ रनको साझेदारी गर्दै इनिङ बचाउने कोशिस गरे तर नियमित रुपमा विकेट खसिरहेपछि टोली कमजोर बन्यो ।

ऐरीको घातक बलिङ, हर्मीत र बोहराको सहयोग

कप्तान दीपेन्द्र सिंह ऐरीले आफ्नो ४ ओभरमा २३ रन खर्चेर ४ महत्वपूर्ण विकेट लिए । उनले मध्य ओभरमा दबाब बनाइ कर्णालीको रन गति थामिदिए । हर्मीत सिंह पनि निकै किफायती साबित भए । उनले ४ ओभरमा १ मेडन राख्दै १९ रनमा २ विकेट निकाले ।

त्यस्तै अविनाश बोहराले पनि प्रभावशाली स्पेल फाल्दै २ विकेट लिए । अनुभवी बलर स्कट कुगेलेइनले आफ्नो ४ ओभरमा केवल ९ रन खर्चेर १ विकेट लिँदै कर्णालीलाई रन बनाउनै नदिने वातावरण सिर्जना गरे । हेमन्त धामीले १ विकेट लिएर बलिङ विभागबाट योगदान पुर्‍याए ।

लिगमा सुदूरपश्चिमको बलियो स्थिति
यस जितसँगै सुदूरपश्चिम रोएल्सले एनपीएल दोस्रो संस्करणमा लगातार तेस्रो जित दर्ता गर्दै अंकतालिकामा आफूलाई अझ मजबुत बनाएको छ । बलिङ र फिल्डिङमा देखिएको तालमेलले टिमको आत्मविश्वास अझै बढाइदिएको छ ।

सुदूरपश्चिमको आगामी खेलमा पनि यिनै बलरले निरन्तरता दिने हो भने टोलीले प्लेअफ लक्ष्य सहजै नजिक पार्न सक्ने देखिन्छ ।