जनमत पार्टीभित्र असन्तुष्टि चुलियो, अध्यक्ष राउतलाई २४ घण्टे अल्टिमेटम

काठमाडौं । जेन–जी आन्दोलनको प्रताप जनमत पार्टीभित्र समेत देखिन थालेको छ । आन्तरिक असन्तुष्टि तीव्र बनेसँगै पार्टीका वरिष्ठ नेताहरूले अध्यक्ष डा. सिके राउतलाई नेतृत्व छाड्न २४ घण्टे अल्टिमेटम दिएका छन् ।

वरिष्ठ उपाध्यक्ष अब्दुल खान, केन्द्रीय प्रवक्ता शरदसिंह यादव, जनमत युवा संघका संयोजक सञ्जयकुमार यादवसहित ६ नेताहरूले सामूहिक पत्रमार्फत राउतलाई तत्काल पदत्याग गर्न आग्रह गरेका हुन् । पत्रमा पार्टीलाई लोकतान्त्रिक, जबाफदेही र जनउत्तरदायी बनाउन नेतृत्व परिवर्तन अपरिहार्य भएको उल्लेख छ ।

नेताहरूको भनाइमा देशको राजनीतिक, सामाजिक र प्रशासनिक प्रणालीमा व्यापक शुद्धीकरणको माग उकालो चढिरहेको बेला जनमत पार्टीले पनि आत्ममूल्यांकन गर्दै नयाँ मार्ग रोज्नु जरुरी भएको छ । उनीहरूले राउतले मार्ग प्रशस्त नगरे पार्टी थप संकटतर्फ धकेलिने चेतावनी दिएका छन् ।