निषेधाज्ञाबीच उपत्यकामा बैंकहरू पुनः सञ्चालन, चार घण्टा खुला रहने

काठमाडौं । जेनजी आन्दोलनका कारण केही दिनदेखि बन्द रहेका काठमाडौं उपत्यकाका बैंकहरू बिहीबारदेखि आंशिक रूपमा पुनः सञ्चालनमा आएका छन् । निषेधाज्ञा जारी रहेकै अवस्थामा बैंकर्स संघको निर्णयअनुसार बैंकहरू बिहान १० बजेदेखि दिउँसो २ बजेसम्म खुला रहने व्यवस्था गरिएको हो ।

गत सोमबार आन्दोलन उग्र रूप लिएपछि विभिन्न स्थानका बैंकहरूमा आगजनी र लुटपाटका घटनाहरू भएको थियो । यद्यपि, संघले यी घटनाबाट नगन्य मात्र क्षति भएको निष्कर्ष निकाल्दै सेवा सुचारु गर्ने निर्णय गरेको हो ।

बैंकर्स संघले अधिकतम तीनवटा शाखासम्म सीमित राख्दै दैनिक चार घण्टा सेवा दिने अनुमति दिएको छ । संघको निर्देशनअनुसार बाणिज्य बैंकहरूले काठमाडौंका केही शाखाहरूबाट सेवा दिन थालेका छन् भने विकास बैंकहरू र अन्य वित्तीय सेवा प्रदायक संस्थाहरूले पनि आंशिक रूपमा सेवा सुचारु गरेका छन् ।

नागरिकहरूलाई अत्यावश्यक बैंकिङ सेवा उपलब्ध गराउने उद्देश्यले यस्तो निर्णय गरिएको बैंकर्स संघले जनाएको छ । स्थिति सामान्य भएसँगै सेवा क्रमशः विस्तारित गरिने तयारी गरिएको छ ।