नेपाल प्रहरीका नवनियुक्त आईजीपी खापुङलाई दर्ज्यानी चिन्ह प्रदान

काठमाडौं । नेपाल प्रहरीका नवनियुक्त महानिरीक्षक (आईजीपी) चन्द्रकुवेर खापुङलाई औपचारिक रुपमा दर्ज्यानी चिन्ह प्रदान गरिएको छ । गृह मन्त्रालयमा आयोजित विशेष समारोहमा गृह सचिव गोकर्णमणि दुवाडीले खापुङलाई दर्ज्यानी चिन्हसहितको फुली लगाइदिएका हुन् ।

शुक्रबार प्रधानमन्त्री निवास बालुवाटारमा बसेको मन्त्रिपरिषद् बैठकले खापुङलाई प्रहरी महानिरीक्षकमा नियुक्त गर्ने निर्णय गरेको थियो । दर्ज्यानी चिन्ह प्राप्त गरेसँगै उनले आजदेखि औपचारिक रुपमा प्रहरी संगठनको नेतृत्व सम्हालेका छन् ।

आईजीपी खापुङ लामो समयदेखि प्रहरी सेवामा रहेर विभिन्न जिम्मेवारी पूरा गर्दै आएका अधिकारी हुन् । उनका सहकर्मीहरूले उनलाई अनुशासित, कार्यकुशल र संगठनप्रति समर्पित प्रहरी अधिकारीका रूपमा वर्णन गर्ने गरेका छन् ।

यसअघि आईजीपी दीपक थापा ३० वर्षे सेवा अवधि पूरा गरेसँगै अनिवार्य अवकाशमा गएका थिए । सोही व्यवस्थाअनुसार खापुङ पनि दुई महिनाभित्रै अवकाश हुनेछन् । छोटो कार्यकाल भए पनि उनले संगठनलाई परिणाममुखी बनाउन केही ठोस कदम चाल्ने अपेक्षा गरिएको छ ।

प्रहरी संगठनभित्र अब नेतृत्व परिवर्तनसँगै नयाँ काम गर्ने शैली र प्राथमिकताहरूको खोजी हुने देखिएको छ । सुरक्षासम्बन्धी चुनौतीहरू बढ्दो क्रममा रहेका बेला आईजीपी खापुङले कसरी नेतृत्वदायी भूमिका निर्वाह गर्छन् भन्ने विषयमा चासो बढेको छ ।