रूपन्देही उपनिर्वाचनमा माओवादी एक्लै लड्ने, अध्यक्ष प्रचण्डको निर्देशन

रूपन्देही । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले पार्टीले रूपन्देही–३ को उपनिर्वाचनमा एक्लै उम्मेदवारी दिने बताएका छन् । आइतबार लुम्बिनी प्रदेश समितिको सातौं पूर्ण बैठकलाई सम्बोधन गर्दै उनले कार्यकर्तालाई त्यसको तयारी थाल्न निर्देशन दिएका हुन् ।

प्रचण्डले हालसम्मका विभिन्न कार्यक्रममा नेपाली कांग्रेस र एमालेका नेताहरूले पनि माओवादीले ल्याएको परिवर्तनको रक्षा माओवादीकै जिम्मा हो भन्ने गरेको उल्लेख गर्दै, यस्तो ऐतिहासिक भूमिका आम जनतासमक्ष प्रस्ट्याउनुपर्ने आवश्यकता औंल्याए ।

उनले भने, “रूपन्देहीमा हामीले पहिला भन्दा राम्रो परिणाम ल्याउँछौं । एक्लै लड्ने हो, तपाईंहरू त्यसको तयारी गर्नुहोस् ।”

रूपन्देही–३ मा कात्तिक १७ गते उपनिर्वाचन तोकिएको छ । यसै सन्दर्भमा माओवादी केन्द्रले प्रतिस्पर्धामा एक्लै जाने निर्णय लिएको हो ।

प्रचण्डले पार्टीभित्र देखिएको असन्तुष्टि र बहसप्रति पनि टिप्पणी गर्दै त्यसलाई वर्गसंर्घषको स्वाभाविक प्रक्रिया बताएका छन् । “यस्ता बहसहरूबाट पार्टी अझ सशक्त बन्छ,” उनले बैठकमा स्पष्ट पारे ।