तीन सातामै भंग भयो रेकर्ड, सुन प्रतितोला २ लाख नाघ्यो

काठमाडौं । नेपालमा सुनको मूल्यले फेरि नयाँ कीर्तिमान बनाएको छ । शुक्रबार प्रतितोला सुन २ लाख ६ सय रुपैयाँमा कारोबार भएको छ, जुन हालसम्मकै उच्चतम मूल्य हो ।

अघिल्लो दिनको तुलनामा प्रतितोला १२ सय रुपैयाँ बढेर सुन महँगिएको हो । यसअघि साउन २३ गते प्रतितोला १ लाख ९९ हजार ४ सय रुपैयाँमा कारोबार भई रेकर्ड बनेको थियो, तर तीन सातामै सो रेकर्ड भङ्ग भएको छ ।

सुनसँगै चाँदीको मूल्यमा पनि वृद्धि भएको छ । अघिल्लो दिन २३५५ रुपैयाँ प्रतितोला रहेको चाँदी शुक्रबार ५ रुपैयाँ बढेर २३६० रुपैयाँमा पुगेको नेपाल सुनचाँदी व्यवसायी महासंघले जनाएको छ । यो मूल्य चाँदीको पनि हालसम्मकै उच्च हो ।