झापा इनर्जीको आइपीओ बाँडफाँड सम्पन्न, अब सर्वसाधारणका लागि दोस्रो चरण खुल्ने

काठमाडौं । झापा इनर्जी लिमिटेडले आयोजना प्रभावित र वैदेशिक रोजगारीमा रहेका नेपालीका लागि निष्काशन गरिएको साधारण शेयर (आइपीओ) बाँडफाँड सम्पन्न गरेको छ ।

कम्पनीलाई कुल ३८ लाख एक हजार ९०० कित्ता सेयर निष्कासनको अनुमति थियो । यसमध्ये आयोजना प्रभावितका लागि तीन लाख ८० हजार १९० कित्ता र वैदेशिक रोजगारीमा रहेका नेपालीका लागि ५७ हजार २९ कित्ता सेयर बिक्री गरिएको हो ।

आयोजना प्रभावित समूहका लागि आइपीओ साउन १४ देखि २८ गतेसम्म खुला गरिएको थियो भने वैदेशिक रोजगारीमा रहेका नेपालीले साउन १४ देखि १८ गतेसम्म आवेदन दिन पाएका थिए ।

यस आइपीओको बिक्री प्रबन्धक हिमालयन क्यापिटल लिमिटेड रहेको छ । पहिलो चरणको बाँडफाँड सकिएसँगै अब दोस्रो चरणमा सर्वसाधारणका लागि शेयर बिक्री खुला गरिने कम्पनीले जनाएको छ ।