मैना सुनार हत्या मुद्दाः आज सर्वोच्चमा फैसला हुँदै

काठमाडौं । सशस्त्र द्वन्द्वकालमा नेपाली सेनाबाट हत्या गरिएकी काभ्रेकी १५ वर्षीया मैना सुनारको हत्या मुद्दामा सर्वोच्च अदालतले आज (भदौ ८) निर्णय सुनाउँदैछ । न्यायाधीश हरिप्रसाद फुयाँल र टेकप्रसाद ढुंगानाको संयुक्त इजलासमा सुनुवाइ सकिएसँगै आजको मितिमा फैसला तोकिएको हो ।

जिल्ला अदालतको फैसलाः सेनाका तीन अधिकारीलाई जन्मकैद
२०७४ वैशाख ३ गते काभ्रे जिल्ला अदालतले मैनाको हत्यामा दोषी ठहर गर्दै तत्कालीन महासेनानी बबी खत्री र सहसेनानीहरू अमिल पुन तथा सुनिलप्रसाद अधिकारीलाई जन्मकैदको फैसला सुनाएको थियो । अदालतमा मुद्दा चल्दाखेरी उनीहरू फरार रहेका थिए ।

सर्वोच्चमा खारेजी माग
काभ्रेपलान्चोक जिल्ला अदालतको फैसलाविरुद्ध सेनाको प्राड विभागका तर्फबाट सहसेनानी सरोज रेग्मीले सजाय खारेजी माग्दै सर्वोच्च अदालतमा रिट दायर गरेका थिए । सोही क्रममा २०८० भदौ ७ गते मैनाकी आमा देवी सुनारले पनि सेनाका तीन अधिकारीविरुद्ध कर्तव्य ज्यान कसुरमा मुद्दा दर्ता गरेकी थिइन् ।

द्वन्द्वकालीन अपराधमा कानुनी प्रक्रिया
घरमै रहेकी मैनालाई गैरकानुनी रूपमा नियन्त्रणमा लिएर ब्यारेकभित्र हत्या गरिएको भन्दै जिल्ला अदालतले दोषी अधिकारीहरूलाई मुलुकी ऐनको ज्यानसम्बन्धी महलको १३(३) अनुसार जन्मकैदको फैसला सुनाएको थियो । अब सर्वोच्चको निर्णयले यो मुद्दाको नयाँ दिशानिर्देश तय गर्नेछ ।