रोल्पामा अरिङ्गालको टोकाइबाट एक विद्यार्थीको मृत्यु, पाँच घाइते

रोल्पा । जिल्लाको त्रिवेणी गाउँपालिका–७ धाक्रीपानीमा अरिङ्गालले टोकेपछि एक विद्यार्थीको मृत्यु भएको छ भने पाँच जना विद्यार्थी घाइते भएका छन् ।

अरिङ्गालले टोकेका ७ वर्षीय मोहन परियारको उपचारका क्रममा जिल्ला अस्पताल रेउघामा राति १ बजेपछि मृत्यु भएको प्रहरीले जनाएको छ । प्रहरी निरीक्षक रोहितकुमार शाहीका अनुसार मोहनले उपचारकै क्रममा प्राण गुमाए ।

अरिङ्गालको टोकाइमा परेर १४ वर्षीया सुनिता परियार, १० वर्षीय शंकर परियार, १० वर्षीया मनिषा परियार, ४ वर्षीय आशिष परियार र ८ वर्षीय कमल परियार घाइते भएका छन् ।

घाइते सबैलाई थप उपचारका लागि दाङको घोराहीस्थित राप्ती स्वास्थ्य विज्ञान प्रतिष्ठानमा रेफर गरिएको प्रहरीले जानकारी दिएको छ ।

मृतक मोहनसहित सबै विद्यार्थी त्रिवेणी गाउँपालिका–७ मा रहेको श्री वीरेन्द्र माध्यमिक विद्यालयमा अध्ययनरत थिए । विद्यालयबाट घर फर्किने क्रममा साँझ करिब साढे ४ बजेतिर तिलाको जंगल हुँदै जाँदा अरिङ्गालले टोकेको थियो ।

घाइते विद्यार्थीलाई राति नै जिल्ला अस्पताल पुर्‍याइएको भए पनि एक विद्यार्थीको भने ज्यान जोगाउन सकिएन ।