नेपालमा मौसम बदली: वर्षा, हिमपात र हावाहुरीको सम्भावना

काठमाडौं । नेपालमा हाल पश्चिमी वायु, स्थानीय वायु तथा पूर्वी भूभाग नजिक तल्लो वायुमण्डलमा विकसित न्यून चापीय प्रणालीको प्रभाव देखिएको मौसम पूर्वानुमान महाशाखाले जनाएको छ । यसका कारण देशका अधिकांश स्थानमा मौसम बदली भएको छ । विशेषगरी कोशी, मधेस, बागमती र गण्डकी प्रदेशका हिमाली तथा पहाडी क्षेत्रहरूमा घना बादल लागेको छ भने अन्य भूभागमा आंशिक बदली रहेको छ ।

आज दिउँसो कोशी, मधेस, बागमती, गण्डकी र लुम्बिनी प्रदेशसहित कर्णाली र सुदूरपश्चिमका पहाडी तथा हिमाली क्षेत्रमा बदली रहने अनुमान छ । यी प्रदेशका धेरै स्थानहरूमा मेघगर्जन र चट्याङ्गसहित मध्यम वर्षा हुने सम्भावना रहेको छ भने उच्च भूभागमा हिमपात पनि हुन सक्छ । विशेषगरी कोशी प्रदेशका पहाडी क्षेत्रमा केही स्थानमा भारी वर्षा हुने चेतावनी दिइएको छ । साथै, तराईका केही क्षेत्रमा हावाहुरी चल्न सक्ने सम्भावना पनि रहेको छ ।

आज राति पनि मौसममा खासै सुधार नआउने देखिएको छ । कोशी, मधेस, बागमती र गण्डकी प्रदेशका धेरै स्थानहरूमा बदली कायम रहनेछ भने लुम्बिनी, कर्णाली र सुदूरपश्चिमका पहाडी तथा हिमाली क्षेत्रमा आंशिकदेखि सामान्य बदली रहनेछ । ती क्षेत्रहरूमा चट्याङ्गसहित वर्षा र हिमपातको सम्भावना कायम रहनेछ ।

कोशी र गण्डकी प्रदेशका पहाडी भूभागका केही स्थानहरूमा राति पनि भारी वर्षा हुन सक्ने अनुमान गरिएको छ । साथै, तराई क्षेत्रमा हावाहुरीको जोखिम यथावत रहने भएकाले सतर्कता अपनाउन मौसमविद्हरूले सुझाव दिएका छन् ।