रास्वपाको केन्द्रीय समिति बैठक आज, यी हुन् मुख्य एजेन्डा

काठमाडौं । राष्ट्रिय स्वतन्त्र पार्टी (रास्वपा) को केन्द्रीय समिति बैठक आज दिउँसो १ बजे पार्टीको केन्द्रीय कार्यालय, वनस्थलीमा बस्ने भएको छ ।

बैठकमा पछिल्लो राजनीतिक परिवेशको समिक्षा गरिनुका साथै रूपन्देही–३ मा तय भएको प्रतिनिधिसभा उपनिर्वाचनमा पार्टीको तयारीबारे विस्तृत छलफल हुने जनाइएको छ ।

त्यस्तै, निजामती सेवा विधेयकमा समावेश गरिएको ‘कुलिङ अफ् पिरियड’ व्यवस्थामाथि संसदीय छानबिन समितिले बुझाएको प्रतिवेदन, भिजिट भिसा दुरुपयोगसँग जोडिएका विषय र संसदमा रास्वपाका सांसदहरूको भूमिका पनि छलफलको केन्द्रमा रहनेछन् ।

बैठकमा पार्टी विधान संशोधनसम्बन्धी प्रस्ताव, केन्द्रीय विभागहरूको प्रगति विवरण र प्रदेश इन्चार्जहरूद्वारा तयार पारिएको प्रदेशगत रिपोर्ट पनि प्रस्तुत गरिनेछ ।

पार्टीका प्रवक्ता मनिष झाले दिएको जानकारी अनुसार, बैठकले हालैको सचिवालय बैठकका निर्णयहरू अनुमोदन गर्नेछ भने अघिल्लोपटक केन्द्रीय समिति सदस्य रहेका व्यक्तिहरूलाई पुनः जिम्मेवारी दिने सम्बन्धमा पनि निर्णय लिइनेछ ।