ट्रान्सफर्मर चोरी प्रकरणमा १२ जना पक्राउ, भारी मात्रामा सामान बरामद

विराटनगर । कोशी प्रदेश प्रहरी कार्यालय, विराटनगरले ट्रान्सफर्मर चोरी प्रकरणमा संलग्न १२ जनालाई पक्राउ गरी मङ्गलबार सार्वजनिक गरेको छ । पक्राउ पर्नेमा चोरीमा संलग्न ७ जना र ती सामान किन्ने ५ जना व्यापारी छन् ।

प्रहरीका अनुसार पक्राउ परेका युवाहरू मोरङको ग्रामथान र बेलबारी तथा सुनसरीको दुहबी क्षेत्रका स्थानीय हुन् । चोरी गरिएका सामग्री किन्ने व्यापारीहरू भने विराटनगर, दुहबी र इटहरीका रहेको डीआईजी ईश्वर कार्कीले जानकारी दिए ।

झापा, मोरङ र सुनसरीका विभिन्न स्थानबाट ट्रान्सफर्मर चोरी भइरहेको सूचनाका आधारमा प्रदेश प्रहरीले निगरानी र ‘स्टिङ अपरेसन’ सञ्चालन गरेको थियो । अनुसन्धानको क्रममा सीसीटीभी फुटेज विश्लेषण, शंकास्पद स्थानहरूको खानतलासी तथा तामा फ्याक्ट्री र भाँडाको पसलहरूमा कडा निगरानी गरिएको थियो ।

चोरीको संलग्नतामा पक्राउ परेकाहरूले सुनसरीबाट १२, मोरङबाट ८ र झापाबाट २ गरी कुल २२ वटा ट्रान्सफर्मर चोरी गरेको प्रहरीको प्रारम्भिक अनुसन्धानले देखाएको छ ।

प्रहरीले उनीहरूबाट ट्रान्सफर्मरमा प्रयोग हुने ३७० किलोग्राम तामाको तार, चोरीमा प्रयोग गरिएका विभिन्न औजारहरू, पाँच थान मोटरसाइकल, एक थान पिकअप गाडी र १२ थान मोबाइलसमेत बरामद गरेको छ ।

बरामद अन्य सामाग्रीमा डायल रेन्च २२ थान, सलाई रेन्च ३ थान, पिलास ३ थान, पेचकस ३ थान, छिनो, कैची, साङ्ली, खन्ती, झम्पल, ह्याक्सो बिलेट, इलेक्टिक ग्रेन्डरसहितका उपकरणहरू रहेका छन् । साथै चोरीमा प्रयोग गरिएको को १ च ७७२९ नम्बरको पिकअप गाडी पनि प्रहरीले नियन्त्रणमा लिएको छ ।

प्रहरीले घटनाको थप अनुसन्धान जारी राखेको जनाएको छ ।