काठमाडौंमा घुम्न आएका बंगाली पर्यटक अपहरण

पाँच भारतीय नागरिक पक्राउ

काठमाडौं । नेपाल घुम्न आएका भारतीय बंगाली पर्यटक अपहरणमा परेको खुलासा भएको छ । अपहरणको आरोपमा प्रहरीले पाँच जना भारतीय नागरिकलाई काठमाडौंका विभिन्न स्थानबाट पक्राउ गरेको छ ।

पक्राउ परेकामा ३८ वर्षीय शिव सौरभ (नयाँ दिल्ली), ३२ वर्षीय दीपक कुमार, ३६ वर्षीय सन्दिप कुमार, ३८ वर्षीय जसप्रित सिंह (तीनैजना पञ्जाब), र ६४ वर्षीय रमेश जाधव (कानपुर) छन् । उनीहरूलाई जिल्ला प्रहरी परिसर काठमाडौं र प्रहरी वृत्त गौशालाको संयुक्त टोलीले नियन्त्रणमा लिएको हो ।

प्रहरीका अनुसार, ती भारतीय नागरिकहरूले नेपाल घुम्न आएका बंगाली पर्यटकहरूलाई सस्तो दरमा घुमाइदिने प्रलोभन देखाएर ललितपुरस्थित एक घरमा लगेर बन्धक बनाएका थिए । बन्धक बनाएपछि ती पर्यटकलाई शारीरिक तथा मानसिक यातना दिइएको र आफन्तहरूसँग ह्वाट्स एपमार्फत फिरौती मागिएको प्रारम्भिक अनुसन्धानबाट खुलेको छ ।

प्रहरी परिसर काठमाडौंका प्रवक्ता एसपी अपील राज बोहराले घटनासम्बन्धी थप अनुसन्धान जारी रहेको बताए । काठमाडौं जिल्ला अदालतबाट पक्राउ परेकाहरूको अनुसन्धानका लागि ६ दिनको म्याद लिएको जानकारी पनि प्रहरीले दिएको छ ।