विपद् जोखिम बढ्दै गएपछि पूर्वतयारी गर्न प्रचण्डको सरकारलाई आग्रह

काठमाडौं । देशका विभिन्न भागमा अत्यधिक वर्षाको सम्भावना रहेको भन्दै नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकारले विपद् प्रतिकार्यमा तुरुन्त पहल गर्नुपर्ने बताएका छन् ।

मौसम पूर्वानुमान महाशाखाले बाढी, पहिरो र डुबानको जोखिम बढेको जनाएपछि सामाजिक सञ्जालमार्फत प्रचण्डले सरकार, जनसमुदाय र पार्टी कार्यकर्तालाई सतर्क रहन आह्वान गरेका हुन् ।

उनले सामाजिक सञ्जालमा लेखेका छन्, ‘देशका विभिन्न क्षेत्रमा लगातारको वर्षाले गर्दा बाढी र पहिरोको सम्भावना बढेको छ। विशेषतः नदी किनारका बस्तीहरू, डुबानग्रस्त होचो भूभाग तथा पहिरोको उच्च जोखिम रहेका क्षेत्रका नागरिकहरू सतर्क रहनुहोला । स्थानीय प्रशासन र सम्बन्धित निकायको सूचना र निर्देशनको पालना गर्नुहोला ।’

प्रचण्डले सरकारलाई आवश्यक पूर्वतयारी र तत्कालीन प्रतिकार्यका लागि ठोस कदम चाल्न अनुरोध गरेका छन् ।

साथै उनले पार्टीका नेता, कार्यकर्ता र सम्पूर्ण तहका कमिटीहरूलाई विपद् व्यवस्थापनमा सक्रिय सहयोग पुर्‍याउन, सूचना प्रवाहलाई प्रभावकारी बनाउन र प्रभावित जनतालाई राहत तथा सुरक्षाका उपायमा खटिन पनि अपिल गरेका छन् ।