निजै सिफारिस, निजै बढुवाः पञ्चेश्वरका अधिकृतको चाखलाग्दो निर्णय

बैतडी । पञ्चेश्वर गाउँपालिकामा कार्यरत निमित्त प्रमुख प्रशासकीय अधिकृत राम सागर शाहले आफैंको सिफारिसमा आफैंलाई पदोन्नति गरेका छन् । सुदूरपश्चिम प्रदेशमा हालै कार्यान्वयनमा आएको स्थानीय सेवा ऐन, २०८१ को एक प्रावधानको प्रयोग गर्दै उनले आफूलाई सातौँ तहमा उक्लाएका हुन् ।

शाहले २०५३ सालको साउन २४ गते स्वास्थ्य सहायक (अहेव) पदबाट सरकारी सेवा यात्रा सुरु गरेका थिए । उनी हालसम्म छैटौँ तहको सहायक जनस्वास्थ्य अधिकृत पदमा कार्यरत थिए । तर स्थानीय सेवा ऐनको दफा ९ को उपदफा ४ लाई आधार मानी उनले पहिलो नियुक्ति मितिलाई गणनाको आधार बनाउँदै आफूलाई जनस्वास्थ्य अधिकृत पदमा पदोन्नति दिएका हुन् ।

पदोन्नति सम्बन्धी निर्णयमा शाहले २०५३ सालकै मितिबाट जेष्ठता कायम हुने स्पष्ट उल्लेख गरेका छन् । निजामती नियमावलीमा यसरी ‘आफैंले आफ्नै बढुवा गर्ने’ अभ्यास निकै दुर्लभ मानिन्छ, जसले गर्दा यो घटनाले हाल बैतडीका प्रशासनिक वृत्तमा मात्र होइन, सुदूरपश्चिमको कर्मचारीतन्त्रमा समेत तरंग ल्याएको छ ।

कर्मचारी वृत्तका कतिपयले यस निर्णयलाई हितको दुरुपयोगु भन्दै आलोचना गरिरहेका छन् भने केहीले ऐनमा रहेको अस्पष्टताले यस्ता निर्णयलाई कानुनी आश्रय दिन सक्ने देखाएका छन् ।