सिंहदरबारमा जलेका सवारी साधन हटाउन थालियो, संसद भवन परिसरमा सारिँदै

काठमाडौं । भदौ महिनामा जेन–जी आन्दोलनका क्रममा सिंहदरबार परिसरभित्र आगजनी गरिएका सवारी साधन हटाउने प्रक्रिया शुरू गरिएको छ । आन्दोलनका क्रममा विभिन्न मन्त्रालय र कार्यालयमा रहेका सयौँ सवारी साधन जलाइएका थिए, जसलाई अब व्यवस्थित गर्ने कार्य अघि बढाइएको हो ।

मन्त्रालय स्रोतका अनुसार हाल ऊर्जा, जलस्रोत तथा सिंचाइ मन्त्रालयको आँगनमा रहेका जलेका गाडीहरू पहिलो चरणमा हटाइँदै छन् । केही दिनभित्र सिंहदरबारभित्रका सम्पूर्ण जलेका सवारी साधनलाई नयाँ बानेश्वरस्थित वीरेन्द्र अन्तर्राष्ट्रिय सम्मेलन केन्द्र (संसद भवन) को परिसरमा राखिने तयारी छ ।

जेन–जी आन्दोलनका क्रममा सरकारी संरचना र सम्पत्तिमा भएको क्षतिले सिंहदरबार क्षेत्र कुरूप बनेको भन्दै ती साधनलाई अन्यत्र स्थानान्तरण गर्ने निर्णय गरिएको हो । मन्त्रालयका अधिकारीहरूका अनुसार संसद भवनको आँगनमा ती साधनलाई अस्थायी रूपमा राख्ने व्यवस्था मिलाइएको छ ।