कांग्रेसको केन्द्रीय समिति बैठक आज सम्पन्न हुँदै, सभापति देउवाको समापन सम्बोधनमा निष्कर्ष सार्वजनिक हुने

काठमाडौं । नेपाली कांग्रेसको जारी केन्द्रीय कार्यसमिति बैठक अन्तिम चरणमा पुगेको छ । यही असार १६ गतेदेखि सुरु भएको बैठक आज (सोमबार) दिउँसो २ बजे पार्टी केन्द्रीय कार्यालय सानेपामा फेरि बस्दैछ, जसपश्चात सभापति शेरबहादुर देउवाको समापन सम्बोधनसहित बैठक टुंग्याइनेछ ।

बैठकको क्रममा आइतबारसम्म पार्टीका अधिकांश पदाधिकारी, केन्द्रीय सदस्य, आमन्त्रित सदस्य, कोषाध्यक्ष तथा सहमहामन्त्रीहरूले आ–आफ्नो विचार प्रस्तुत गरिसकेका छन् ।

आजको बैठकमा बाँकी प्रमुख पदाधिकारीहरूले धारणा राख्ने कार्यक्रम रहेको छ । पार्टी स्रोतका अनुसार महामन्त्रीद्वय गगनकुमार थापा र विश्वप्रकाश शर्मा, उपसभापतिद्वय पूर्णबहादुर खड्का र धनराज गुरुङ आज आफ्ना अन्तिम टिप्पणीसहित बैठकमा सम्बोधन गर्नेछन् ।

प्रस्तावहरू निर्णयका लागि प्रस्तुत हुँदै
बैठकका अन्तिम चरणमा नेतृत्वले प्रस्तुत गरेका राजनीतिक, सांगठानिक तथा समसामयिक प्रस्तावहरू निर्णयार्थ पेस गरिने तयारी भएको छ । देउवाको सम्बोधनपछि बैठकले ठोस निष्कर्षसहित आफ्नो कार्यसूचीलाई टुंगो लगाउने बताइएको छ ।

व्यापक सहभागिता
कांग्रेस विधानअनुसार केन्द्रीय कार्यसमितिमा १६७ सदस्य रहने प्रावधान भए पनि सभापति देउवाका प्रतिस्पर्धी समेत समावेश भएकाले कार्यसमिति अहिले १६८ सदस्यीय छ ।

बैठकमा सहभागीमध्ये तीन जना आमन्त्रित केन्द्रीय सदस्य, सात प्रदेश सभापति र चार जना मन्त्रीहरू— रामनाथ अधिकारी, ऐनबहादुर शाही ठकुरी, तेजुलाल चौधरी र खमबहादुर गर्बुजाले पनि आ–आफ्ना धारणा प्रस्तुत गरिसकेका छन् ।

पार्टीभित्रको नीति, सरकारसँगको सम्बन्ध, भावी चुनावी तयारी तथा कार्यशैली सुधारका विषयमा व्यापक छलफल भएको भन्दै बैठकको निष्कर्षले संगठनलाई गति दिने अपेक्षा गरिएको छ ।