संघीय निजामती सेवा विधेयक प्रतिनिधिसभाबाट पारित, अब राष्ट्रिय सभातर्फ

काठमाडौं । संघीय निजामती सेवा सम्बन्धी विधेयक आइतबार प्रतिनिधिसभाबाट पारित भएको छ ।

विधेयक पारित हुनुअघि संघीय मामिला तथा सामान्य प्रशासन मन्त्री राजकुमार गुप्ताले सांसदहरूले उठाएका जिज्ञासामा जवाफ दिएका थिए । उनले यो विधेयक नेपालको संविधान २०७२ अनुसार ल्याइएको स्पष्ट पारे ।

मन्त्री गुप्ताका अनुसार विधेयक कानुनका रूपमा कार्यान्वयनमा आएपछि प्रशासनिक संघीयताको कार्यान्वयनमा सहजता आउने विश्वास गरिएको छ ।

राज्य व्यवस्था तथा सुशासन समितिबाट पारित भएको विधेयकमा कुनै संशोधन नगरि त्यसैका आधारमा पारित गरिएको हो । यसअनुसार संघीय निजामती सेवाबाट अवकाश लिएका कर्मचारीहरूले संवैधानिक निकायमा नियुक्ति पाउन कम्तीमा दुई वर्षको अवधी कुर्नुपर्ने व्यवस्था रहनेछ ।

प्रतिनिधिसभाबाट पारित यो विधेयक अब छलफल तथा पारितिका लागि राष्ट्रिय सभामा पठाइनेछ।