उपसभामुख रानामगर हटाउने प्रयासको विरोधमा माओवादी केन्द्रको बैठक

काठमाडौं । नेकपा माओवादी केन्द्रले उपसभामुख इन्दिरा रानामगरलाई पदबाट हटाउने प्रयास बदनियतपूर्ण भएको ठहर गर्दै त्यसको कडा विरोध गरेको छ ।

मंगलबार पार्टी कार्यालय पेरिसडाँंडामा बसेको पदाधिकारी बैठकले सरकारको कदम अस्वाभाविक र जनताको हितविपरीत भएको निष्कर्ष निकालेको माओवादी प्रवक्ता अग्नि सापकोटाले जानकारी दिए । उनले सरकार अधिनायकतर्फ उन्मुख भएको र विभिन्न विधेयकमा अनैतिक हस्तक्षेप गरिरहेको आरोप लगाए ।

सापकोटाले बताएअनुसार, भूमि विधेयकमा आफ्नो मान्छेलाई लाभ दिन खोज्ने प्रयास र शिक्षा विधेयकमा प्रभाव पार्ने गतिविधि सरकारको गलत नीति प्रमाणित गर्दैछ । उनका अनुसार यसले व्यवस्था विरोधीलाई अवसर प्रदान गर्ने अवस्था सिर्जना गरेको छ ।

बैठकमा स्थायी कमिटी निर्णयको कार्यान्वयन, कार्य विभाजन लगायतका विषयमा छलफल गर्ने तयारी नपुगेकाले आगामी बुधबार हुने पदाधिकारी बैठकले आवश्यक निर्णय गर्ने तय भएको छ ।