नवनियुक्त चार मन्त्रीको आज सपथ, रोकिए मिश्रा

काठमाडौं । मन्त्रिपरिषद्‌मा थपिन सिफारिस गरिएका पाँचमध्ये चार जना मन्त्रीले आज सपथ ग्रहण गर्दैछन् । दिउसो २ः०० बजे राष्ट्रपति कार्यालय शितल निवासमा नवनियुक्त मन्त्रीहरुले सपथ लिनेछन् ।

आइतबार बसेको मन्त्रिपरिषद् बैठकले पाँच जना मन्त्रीको नाम सिफारिस गरेको थियो । तर, तीमध्ये डाक्टर संगीता मिश्राको नाम होल्डमा परेपछि चार जनाले मात्र आज पद तथा गोपनीयताको सपथ लिन लागेका हुन् ।

पूर्व सर्वोच्च अदालतका न्यायाधीश अनिलकुमार सिन्हालाई उद्योग, वाणिज्य तथा आपूर्ति, कानुन, न्याय, भूमि सुधार, सहकारी तथा गरिबी निवारण मन्त्रालयको जिम्मेवारी दिइएको छ । त्यस्तै महावीर पुनलाई शिक्षा, विज्ञान तथा प्रविधि मन्त्रालय, मदनप्रसाद परियारलाई कृषि मन्त्रालयको जिम्मेवारी सुम्पिएको छ भने जगदीश खरेलले सञ्चार मन्त्रालय सम्हाल्ने छन् ।

डाक्टर संगीता मिश्रालाई स्वास्थ्य मन्त्रालयको जिम्मेवारी दिइएकोमा उनको नाम होल्डमा छ । स्वास्थ्य क्षेत्रमा लामो अनुभव बोकेकी डा. मिश्रालाई मन्त्रालयको नेतृत्व दिने तयारी भए पनि उनीमाथि लागेको भ्रष्टाचार मुद्दा विवाद बनेपछि प्रधानमन्त्री सुशीला कार्कीकै निर्देशनमा उनको नाम रोकिएको बालुवाटार स्रोतले जनाएको छ ।

यसअघि प्रधानमन्त्री कार्कीसहित चार सदस्यीय मन्त्रीमण्डल मात्रै सक्रिय थियो । नयाँ चार मन्त्री थपिएपछि मन्त्रिपरिषद विस्तार भएको छ ।