घरायसी विवादपछि श्रीमान्–श्रीमतीले एकैपटक भिरबाट हाम फाले, श्रीमतीको मृत्यु

चितवन । चितवनको राप्ती नगरपालिकामा एक दम्पतीले घरायसी विवादपछि भिरबाट हाम फालेका छन् । हाम फाल्दा श्रीमतीको ज्यान गएको छ भने श्रीमान् गम्भीर घाइते भएका छन् ।

राप्ती–४ निवासी ४२ वर्षीया कुमारी प्रजाको घटनास्थलमै ज्यान गएको जिल्ला प्रहरी कार्यालय चितवनका प्रहरी नायब उपरीक्षक (डीएसपी) रवीन्द्र खनालले जानकारी दिए । उनका अनुसार घरेलु विवादले चर्किएपछि कुमारीले घरनजिकै रहेको खहरे खोलातर्फको भिरबाट हाम फालेकी थिइन् ।

उनको हामफालेलगत्तै श्रीमान् लीलाबहादुर प्रजाले पनि सोही स्थानबाट हाम फालेका थिए । गम्भीर घाइते अवस्थामा भेटिएका उनलाई अहिले भरतपुर अस्पतालमा उपचार भइरहेको प्रहरीले जनाएको छ ।

प्रहरीले घटनाबारे थप अनुसन्धान भइरहेको जनाएको छ ।