क्रिसमस पार्टीमा भएको कार दुर्घटनामा पाँचजनाको मृत्यु, २०० भन्दा बढी घाइते

जर्मनी । क्रिसमस पार्टीमा एक कार भीडमा पसेपछि भएको दुर्घटनामा मृतकहरूको संख्या पाँच पुगेको छ। मृतकमध्ये एक नौ वर्षीय बालक रहेको छ। शुक्रबार साँझसम्म यस घटनामा २०० भन्दा बढी घाइते भएका छन् भने ४१ जनाको अवस्था गम्भीर रहेको छ। अन्तर्राष्ट्रिय सञ्चारमाध्यमहरूका अनुसार, दुर्घटनाको चपेटामा परेका अधिकांश व्यक्तिहरू पार्टीमा सहभागी थिए।

घटनामा प्रयोग गरिएको बीएमडब्लु कारले पाँच सय मिटरको दूरीमा भीडलाई चपेटामा पारेको थियो। तीन मिनेटभित्र यो घटना भएको बताइएको छ। घटनाको दोषीका रूपमा ५० वर्षीय तालेब अल अब्दुल मोसेनलाई प्रहरीले पहिचान गरेको छ। साउदी अरेबियाका नागरिक उनी सन् २००६ मा जर्मनी आएका थिए र पेशाले चिकित्सक हुन्।

घटनाबारे छानबिन भइरहेकाले प्रारम्भिक रिपोर्टमा यो घटना जर्मनीमा साउदी शरणार्थीहरूमाथि हुने व्यवहारका कारण उत्पन्न आक्रोशको नतिजा भएको देखिएको छ। तर, उनको कुनै कट्टरपन्थी इस्लामिक संगठनसँग सम्बन्ध फेला परेको छैन।

सरकारी वकिल कार्यालयले दोषीमाथि अनुसन्धान जारी राखेको छ र मुद्दा दर्ता गर्ने तयारी भइरहेको छ। हालसम्म उनको गतिविधिमा अन्य कुनै व्यक्तिको संलग्नता पुष्टि भएको छैन।

दुर्घटनापछि घटनास्थलमा १०० प्रहरी, स्वास्थ्यकर्मी, र ५० उद्धारकर्मी तैनाथ गरिएका थिए। आरोपी साइकोथेरापिस्टको रूपमा काम गर्थे र सन् २०१६ देखि जर्मनीमा शरणार्थीका रूपमा बसोबास गरिरहेका थिए। घटना मागडेबर्गको ४० किलोमिटर दक्षिणमा भएको हो।