कर्णालीले क्वालिफायर टु मा स्थान सुरक्षित गर्‍यो

काठमाडौं । कर्णाली याक्सले एनपीएलको एलिमिनेटर खेलमा चितवन राइनोजलाई २१ रनले पराजित गर्दै क्वालिफायर टु मा स्थान बनाएको छ । अब कर्णालीले क्वालिफायर वानको पराजित टोलीसँग प्रतिस्पर्धा गर्नेछ ।

१७६ रनको लक्ष्य पछ्याउँदै मैदानमा उत्रिएको चितवनले १५४ रन मात्र बनाउन सक्यो । रवि बोपाराले अर्धशतक प्रहार गरे पनि टोलीलाई जित दिलाउन असफल रहे । चितवनका लागि अन्य खेलाडीबाट उल्लेखनीय प्रदर्शन हुन सकेन । बलिङतर्फ कर्णालीका जिशान मकसुदले उत्कृष्ट प्रदर्शन गर्दै ३ विकेट लिए भने सोमपाल कामी र नन्दन यादवले समान २–२ विकेट झारे । विपिन प्रसाद शर्माले पनि १ विकेट लिए ।

चितवनका बोपाराले ३४ बलमा ३ चौका र ४ छक्काको मद्दतमा ५३ रन बनाएका थिए । यो एनपीएलमा उनको तेस्रो अर्धशतक हो । कप्तान कुशल मल्लले २१ रन बनाए ।

यसअघि, टस हारेर पहिले ब्याटिङ गरेको कर्णालीले जयकिसन कोल्सावाला र विलियम बोसिस्टोको अर्धशतकको मद्दतले ६ विकेटको क्षतिमा १७५ रनको चुनौतीपूर्ण योगफल तयार पारेको थियो । डेब्यू खेलमा उत्रिएका कोल्सावालाले ३९ बलमा ६ चौका र २ छक्काको मद्दतले सर्वाधिक ५३ रन जोडे । यस्तै, बोसिस्टोले पनि ३९ बलमै ३ चौका र २ छक्कासहित ५२ रन बनाए ।

चाडविक वाल्टनले मात्र २३ बलमा ४ चौका र ३ छक्काको मद्दतले अविजित ४६ रन जोडे । जिसन मकसुदले १४ रन थपेका थिए । ओपनर रित गौतम र गुल्सन झा भने खाता खोल्न असफल रहे । चितवनका बलरहरूबाट सोहेल तनविरले २ विकेट लिँदा, रवि बोपारा र कप्तान कुशल मल्लले समान १–१ विकेट झारे ।

कर्णालीको यो जितले उनीहरूलाई फाइनल प्रवेशको लागि थप एक अवसर दिएको छ ।