देउवा पक्षले आजदेखि छुट्टै कांग्रेस अधिवेशन प्रक्रिया थाल्दै

काठमाडौं । नेपाली कांग्रेसका पूर्वसभापति शेरबहादुर देउवा पक्षले पार्टीको १५औँ महाधिवेशनका लागि छुट्टै अधिवेशन प्रक्रिया अघि बढाउँदै छ । संस्थापन पक्षले महाधिवेशनको तयारी तीव्र बनाइरहेका बेला देउवा पक्षले आफ्नै कार्यतालिकाअनुसार बिहीबारदेखि वडा अधिवेशन सुरु गर्न लागेको हो ।

देउवा पक्षले असोज १५ गते देशभर वडा अधिवेशन गर्ने तयारी गरेको जनाएको छ । त्यसपछि असोज २० गते पालिका अधिवेशन, असोज २३ गते प्रदेशसभा निर्वाचन क्षेत्र तथा प्रतिनिधिसभा निर्वाचन क्षेत्रको अधिवेशन गर्ने कार्यतालिका बनाइएको छ ।

त्यसैगरी कात्तिक १५ गते जिल्ला अधिवेशन र मंसिर ४ गते प्रदेश अधिवेशन गर्ने तयारी देउवा पक्षको छ । अन्तिम चरणमा मंसिर २१ देखि २३ गतेसम्म काठमाडौंमा १५औँ महाधिवेशन आयोजना गर्ने गरी कार्यतालिका तय गरिएको छ ।

संस्थापन पक्षले भने असोज १६ देखि १९ गतेसम्म १५औँ महाधिवेशन गर्ने तयारी अघि बढाइरहेको छ । यससँगै कांग्रेसभित्र एउटै महाधिवेशनका लागि दुई पक्षबाट छुट्टाछुट्टै प्रक्रिया अघि बढेको अवस्था बनेको छ ।

देउवा पक्षले महाधिवेशनको तयारीका लागि ७७ वटै जिल्लामा निर्वाचन अधिकृत तथा विभिन्न जिल्लामा संयोजक खटाएको जनाएको छ। वडा अधिवेशन सम्पन्न गर्न मात्रै ५६ जिल्लामा निर्वाचन संयोजक परिचालन गरिएको बताइएको छ ।

पार्टीको आधिकारिकतासम्बन्धी विवाद सर्वोच्च अदालतमा विचाराधीन रहेकाले तत्काल महाधिवेशन गर्न नहुने पक्षमा देउवा समूह रहँदै आएको थियो । तर संस्थापन पक्षले आफ्नो कार्यतालिकाअनुसार अधिवेशन प्रक्रिया अघि बढाएपछि देउवा पक्षले पनि समानान्तर रूपमा छुट्टै प्रक्रिया सुरु गर्ने निर्णय गरेको हो ।

देउवा पक्षले १४औँ महाधिवेशनबाट निर्वाचित केन्द्रीय कार्यसमितिलाई नै कांग्रेसको आधिकारिक कार्यसमिति मान्दै आएको छ । यही कारण संस्थापन पक्षले अघि बढाएको महाधिवेशन प्रक्रियामा देउवा समूह सहभागी भएको छैन ।

देउवा पक्षका महाधिवेशन आयोजक समितिका संयोजक डा. शशांक कोइरालाले वडा तहदेखि नै पार्टी संगठनलाई सुदृढ, अनुशासित र जनमुखी बनाउनुपर्ने बताएका छन् । उनले वडा अधिवेशनमा नेता, कार्यकर्ता तथा क्रियाशील सदस्यलाई उत्साहपूर्वक सहभागी हुन आह्वान गरेका छन् ।

कांग्रेसभित्र देखिएको विवादका बीच दुवै पक्षले आ–आफ्नै ढंगले महाधिवेशन प्रक्रिया अघि बढाएपछि आगामी दिनमा पार्टीको संगठनात्मक संरचना र आधिकारिकतासम्बन्धी विषय थप महत्वपूर्ण बन्ने देखिएको छ ।