हेटौँडामा सेनाको ट्रक दुर्घटना, १६ सैनिक घाइते

हेटौँडा । मकवानपुर र बाराको सिमानामा पर्ने हेटौँडा उपमहानगरपालिका–१५, चुरियामाईस्थित पूर्व–पश्चिम राजमार्गमा मंगलबार दिउँसो नेपाली सेनाको ट्रक दुर्घटना हुँदा १६ जना सैनिक घाइते भएका छन् ।

लगभग दिउँसो २ः५० बजे तनहुँस्थित नं. २ राजदल गणबाट धनुषा तर्फ गइरहेको उप सेनानी हर्ष विक्रम अधिकारीको कमाण्डमा रहेको टोली सवार ट्रक दुर्घटनामा परेको हो ।

सैनिक टोलीसँगै जाँदै गरेका चारवटा ट्रकमध्ये लु. ग २८० नम्बरको ट्रक सडक किनारको पुलबाट करिब १०–१२ फिट तल खोल्सामा खस्दा दुर्घटना भएको मकवानपुर प्रहरीले जनाएको छ । सो ट्रकमा २२ जना सेना सवार थिए ।

प्रहरी नायव उपरीक्षक (डीएसपी) श्यामु अर्यालका अनुसार घाइतेमध्ये ३ जनाको अवस्था गम्भीर छ भने बाँकीको सामान्य चोटपटक छ ।

घटनापछि प्रहरी र सेनाको टोलीले उद्धारकार्य गरी घाइते सैनिकलाई तत्काल हेटौँडा अस्पताल पुर्‍याइएको छ ।