मुख्यमन्त्री लामाले पुनः संसदीय दलको नेताका लागि उम्मेदवारी दिए

हेटौँडा । नेपाली कांग्रेस बागमती प्रदेश संसदीय दलको नेताका लागि मुख्यमन्त्री बहादुरसिंह लामाले पुनः उम्मेदवारी दिएका छन् ।

मंगलबारमात्रै दलको नेताबाट बहुमतले हटाइएका लामाले बुधबार सुरु भएको नयाँ निर्वाचन प्रक्रियामा सहभागी भएर पुनः नेतृत्वमा फर्किने प्रयत्न गरेका हुन् ।

प्रदेशसभा भवन परिसरमा जारी निर्वाचन प्रक्रियामा सांसद तीर्थ लामाको प्रस्ताव र अर्थमन्त्री कुन्दन काफ्लेको समर्थनमा उनले उम्मेदवारी दर्ता गराएका हुन् ।

गत शुक्रबार संसदीय दलको कार्यालयमा दर्ता भएको अविश्वास प्रस्तावमा मंगलबार मतदान हुँदा २२ सांसदले पक्षमा मत दिएपछि लामा पदमुक्त भएका थिए । कुल ३७ जना कांग्रेस सांसदमध्ये बहुमतले अविश्वास प्रस्ताव पारित गरेसँगै नेताको नयाँ चयन प्रक्रिया अघि बढाइएको हो ।

अब दलको नयाँ नेताका लागि लामा र सांसद बद्रीप्रसाद बानिया प्रतिस्पर्धामा छन् । बागमती प्रदेशमा कुल ३७ सांसदमध्ये २२ जना बानियाको पक्षमा देखिन्छन् भने १५ जना लामासँग छन् ।

निर्वाचन समितिका अनुसार आज दिउँसो २ बजेदेखि ३ बजेसम्म मतदान प्रक्रिया सञ्चालन हुनेछ ।